Tafaska t-7, i d-yellan deg temdint n Bgayet, i yebdan seg wass n 5 deg ɣuct tfuk s yiwet n tmeɣra d tameqqrant deg uxxam n yidles Taos Amrouche. Yerna-yas ccan i tmeɣra mi yeḥḍer Ccix Abdelouahab Abjawi, yiwen seg wid i d-yernan aḍref-ines i ccna amaziɣ s umata. Azal yennerna i tmeɣra mi d-yemmeslay Ccix : “tanemmirt tameqqrant i wid i yi-d-yemmektan, d tajmilt i yi-d-yesseɣlin imeṭṭawen. S lferḥ d ameqqran ay lliɣ yid-wen, aql-in gar-awen. Ur t-tettuɣ ara aya”
Tameɣra n taggara ideg yeḥḍer lmir n Bgayet d umezwaru n tesqamut aɣerfan n lwilaya (APW), ur tfukk almi d 2 yiḍ. Ibgaytiyen zhan mačči d kra s ccna n Qasi Abjawi, Lḥesnawi Amecṭuḥ,; Buɛlama Caker, Kusayla, Tarbaɛt n ccḍeḥ n Lezzayer tamaneɣt, d 3-nni i d-yufraren deg temzizelt n ccna. Dɣa, ɣef temzizelt n useggas-a, Malek Bucebbaḥ,; yiwen seg yiɛeggalen n tesqamut n ufran, yenna-d : “aseggas-a yif wiyaḍ. I tikelt tamezwarut i d-yella usnulfu, ama deg tmedyazt ama deg tmuzigt ; mačči am zik, d aɛiwed n tuɣac n wiyaḍ. Yella-d umaynut, d ayen i yessefraḥen, d ayen i d-yemmalen azal n tfaska. Yerna, yuɛer nezzeh ad tefren gar wid yecnan i temzizelt.” Ma d wid i d-tefren tesqamut, ad naf deg ccna atrar, Outaleb Melila ; deg ccna n cceɛbi Boulila Lyes i yewwin daɣen arraz n usnulfu ; deg folklore Outaleb Sonia. Ma d arraz n Abdelouahab Abjawi, yewwi-t Adjerrad Yugurten.
Γer taggara n tmeɣra, naẓ ɣer Ccix Abdelouahab abjawi, ad nmeslay cwiṭ yid-s. Deg wudem-is, iban yeɛya meɛna yefreḥ mačči d kra imi t-id-mmektan warraw-is. Yeḥka-d aṭas, awal yewwi-d wayeḍ almi d-yewweḍ ɣer yicennayen n wass-a, ɣef umgirred gar wid n zik d wid n tura. Dɣa, yenna : “zik, nxeddem. Aɣrum-nneɣ mačči d ccna i t-iḍemnen. Nḥemmel ccna, nettemlil ncennu akk baṭel ama deg tmeɣra ama deg rradyu de Bougie. Ncennu axaṭer nḥemmel ad necnu mačči akken ad d-nawi kra telqimt yes-s.”
Dj. Ikhloufi