Snat n temdinin Tigzirt d Azeffun, i d-yezgan deg ugafa n lwilaya n Tizi Wezzu, tid mucaɛen, ilmend n ccbaḥa n teftisin-nsent. Tineggura-agi, iwumi qqaren timdinin takniwin, ur sɛint ara ttawil n usiweḍ i tent-icudedn ɣas akken nutenti beɛdent anagar s 35 km ɣef ubrid aɣelnaw w-24. Γef waya iwakken ad ruḥen yimezdaɣ n tɣiwant n Tigzirt ɣer Azeffun, ilaq ad ɛeddin s temdint n Tizi Wezzu i ibeɛden s 40 km, syin ad ḥufen ttawil n usiweḍ ɣer Azeffun i ibeɛden s wazal n 60 km ! Gar rrwaḥ d tuɣalin laqent 4 swayeɛ.
Aya d ayen yeǧǧan snat n tamiwin-agi ur sɛunt ara assaɣen gar-asent ɣas akken nutenti d tid yeḥwajen ayagi. Imi aḥric n tmerrit yessutur ttawilat n usiweḍ. Tamnaḍt-agi n leqbayel, d tin yettidirin deg uḥbas n tdamsa-ines ladɣa seg 13 yiseggasen segmi yeɣleq ubrid aɣelnaw w-24 yessawaḍen gar temdint n Delles d Tigzirt s sebba n lixsas n laman. Ayen yeǧǧan imezdaɣ,; ladɣa ikumersiyen, ad xedmen ussan n uḥbas, maca abeddel ur d-yelli.
I usmekti, deg useggas n 40, deg tallit n yirumiyen, yella yiwen n lkar yessawaḍen gar snat-agi n temdinin, Tigzirt d Azeffun. Deg yiseggasen 80 d Lassata i yessawaḍen gar-asent. Ma d ass-a, ulac ttawil n usiweḍ ula d abrid ur yexedim ara. Yiwen n umezdaɣ n Tigzirt, yenna-aɣ-d : “ula mi tleḥqeḍ ɣer At Rhunna ad ifakk ubrid am wakken ɣer lqifar i tleḥḥuḍ.”
Deg taggara, ad d-nini, anegmu n tmerrit deg tmurt n Leqbayel ur d-yettili ara anagar s tullya n yiberdan d ttawulat n usiweḍ i yeǧǧan amaḍal ad yuɣal d taddart.
Dalila I.