Tidukla “Ɛemmi Amar” n taddart n Semmache i d-yezgan di tɣiwant n Leɛǧiba terra deg wussan-agi ineggura tajmilt i yiwen n yilemẓi i teccelqef lmut ass n umenzu di yunyu iɛeddan. Ilmend n waya, yettwahegga-d yiwen n wahil d amerkanti yesduklen gar waddal, idles d tmusni. Imḍebbren n tdukla-agi gren tiɣri i kra n yemyurar iqdimen yellan di Lesnam, Beclul, Leɛǧiba d wid n taddart-nsen iwakken ad uraren kra n temliliyin n tegmat ɣef rruḥ n yilemẓi-agi iwumi qqaren “Ɛala”. Imi, taggara n wurar ifuk ass n lexmis yezrin, iɛeggalen n tejmaɛt-agi swejden-d yiwet n temlilit d kra n yimedyazen n taddart anda yal yiwen deg-sen yusa-d s yiwet n terzeft. Am wakken i yella yiwen n usarag i yessedda Lḥaǧ Saɛid Buyezri, d asdawan di temsal n ccreɛ akked ddin, yezzin ɣef kra n tlufa tettidir tmetti. Leqdic-agi yefra s tikci n kra n warrazen i twacult Salmi akked wid yekkin di temliliyin ama tidelsanin neɣ n waddal. Arrazen-agi, ilaq ad d-nebder d akken ttunefken-d sɣur yimḍebber amenzu n tɣiwant n Leɛǧiba. Γef wakken i aɣ-d-yenna A. Bellal, yiwen seg yiɛeggalen n tdukla-agi : “leqdic-nneɣ yeḍra-dddaw leɛnaya n lmir n tɣiwant-nneɣ i d-yefkan afus n lemɛawna. Tajmaɛt-nneɣ ur teksib ara ttawilat i s ara tqabel ahil-agi. Γef waya, ad nerr tajmilt akk i wid i d-yellan di lmendad, iwakken ad d-nemmekti ass-a ilemẓi-agi yuklalen ugar n wannect-a.” Ilaq kan ad d-nesmekti d akken M.C. Salmi, iɣer d-teɛjel lmut di lɛemr-is 39 n yiseggasen, d yiwen n umdan ur nebri ara i ṭṭbel deg waman mi akken yeḥma useqqi. Kra n wagguren kan mi d-yeffeɣ si lɛesker, yerfed lfuci mgal rrebrab iwakken ad ikemmel i lwaǧeb-is. D yiwen n yilemẓi iɣef yella ttkal deg waṭas n tegnatin, ur yettɛeddi fell-as uzaylal. D acu kan, tiraga ffɣent mxalfa, imi yemmut daxel lkazirna s ufus n yiwen seg yimdukal-is. Γef wakken i nesla, ass-nni dɣa, yemma-s tuɣ tettnawal seksu i tettheggi i zzwaǧ n mmi-s-agi. Yeɣli-d leḥzen am wabbu, yesberber-d am wagu, yejreḥ acḥal n tasiwin. Din i yeqḍeɛ asirem n temɣart. D acu kan, akken bɣun qessiḥit wussan, tajmilt-agi s wazal-is, acku lmut iweɛren mi akken ara ttun medden win yemmuten.
M. Smail