Am yal aseggas, deg tallit yecban 20 di ɣuct 2009, ad tafeḍ FFS, FLN, leɛruc, tuddsa n yimjuhad (ONM) d tin n yimeɣrasen (ONEC, CNEC), rnu-as tidukliwin d tuddswin-nniḍen, ttnejmaɛen-d ɣer Yifri-Uzellagen akken ad d-smektin s uswir n Summam d wass n umjahed. Meɛna, yal yiwet seg-sent amek i t-yewzen, amek i t-yefhem neɣ amek i t-yessefham i wiyaḍ.53 n yiseggasen i iɛeddan seg wasmi i yessaweḍ Abane ad d-yesdukel, wid akk yettnaɣen i tmunent n Lezzayer, deg Ifri-Uzellagen, akken ad as-fken i lgirra n wenber 54 tamuɣli-nniḍen, tamuɣli n tsertit, tamuɣli ara iressen tamurt n Lezzayer ɣef tugdut ; mazal wid i iḥekmen sfunxuren s le jacobinisme, s tɛerbubt d tneslemt, d widak-a kan i d inyen n ddula tazzayrit.
Abane, Ben Mhidi, Krim Belkacem, Ali khodja, Ali Mellah, Ouamrane, Azeddine d wiyaḍ ssawḍen ad d-awin ikabaren am PCA, UDMA d wid iwumi qqaren les centralistes n MTLD ɣer tmuɣli n FLN-ALN n lawan-nni, tamuɣli n timunent s sslaḥ. Ma d tura, wid yumnen s uswir akked tɣerɣert n Summam, ttrajun ahat melmi ara d-yemɣi gerninuc gar yinyen ?
D. I.