Aṭas i yeɣran neɣ ahat i yeslan s tiɣri n twacult n Nabil i irewlen seg uxxam di 16 di yulyu i iεeddan. Aṭas diɣ i yesḥasfen ɣef yisalli am wa acku neẓra taggara-s amek-itt. Maca imawlan-is ur qḍiεen ara asirem, ur ğğin amkan, nudan, steqsan, lesqen tiɣri-nsen di yal amkan. Ɛeddan acḥal d ussan, acḥal d aggur, tasa teḥreq, tiqit n usirem ulac-itt… armi yekcem layas ulawen, tawacult-is tumen akken iruḥ mebla tuɣalin. Maca ass n lğemεa-aya i iεeddan, yewweḍ-d lexbar i yessefraḥen, Nabil yuɣ-it lḥal yettmengar deg yiberdan n Lezzayer, rran-t s axxam n ttrebga. D tadyant i icuban asaru, aṭas ur yuminen ara, maca d tidet temlal tasa d wayen turew !
Djamila Ah.