Deg tɣiwant n timizart i d-yezgan deg dayra n Wagnun, mačči kan d iberden i yeqqimen hudden ur ttwaxdem ara, neɣ d ixmir i d-yesker ugeffur mi ara d teɣli tiqqit, neɣ lixsas n lxedma i yilmeẓyen d tlemeẓẓyin n tamnaṭ-agi, neɣ… Ala ! Deg Timizart ula d trisiti terna-d lḥeq-is. Ulac ddurt ideg ur tegzim ara, tikwal qrib ass kamel.
Yenna-k yiwen umezdaɣ s ustehzi : « isuḍ-d ubeḥri ? Attan trisiti-nni tamerbuḥt truḥ ! Γlint-d tlata neɣ rebεa n tmiqwa seg yigenni, attan diɣ tamcumt-nni tegzem ! Yennerna cwiṭ uzɣal, kifkif tirisiti tsuhel ! Lḥasun mačči d kra iwumu sebren yimezdaɣ. »
Imḍebbren n tɣiwant mi ara ten-ilaεi umezdaɣ ɣef wanect-a, qqaren nezga nessawel i sonelegaz. Ayen ttrajun yimezdaɣ n tɣiwant-a d tifrat taḥeqqanit n unegzum n trisiti.
Meεna am wakken i as-yenna umedyaz deg wawal-iw; “araju, tikwal d lbaṭel”
Ait Slimane Hamid