Isem-is yeggra-d i lebda

Iεdawen n tmurt mačči n wass-agi kan neɣ n yiḍelli kan. Wid i isexnunsen Kamel Amzal iḍelli i ixenqen tamurt ass-a. Ggulen ur yuli yiṭij ɣef tmurt, ggulen akken ad gezmen yal axalaf, ggulen ad sexsin yal taftilt iceεlen.

Wid i d-iɣeḍlen rrehba ɣef tmurt n Lezzayer εzizen sexdamen ddin n tneslemt akken ad samnen imdanen, ad ddun deg lğerra-nsen. Ssaɣen ajeǧğiḍ-nsen i yal tamnaḍt n tmurt, dɣa reṣṣan iman-nsen maca nutni ur tt-bnin ara ɣef tidet, yal taɣawsa-nsen d akellex.

Wid yeččuren d tayri n tmurt wwten s tezmert-nsen, begnen-d ayen yellan deg-sen akken ad bnun tamurt, ad teddu ɣer zdat.

Γas akken imdanen-agi imagdayen srewten i leḥfa i lfayda n tmurt, maca ur tufiḍ iɣelten, srewten εebban wiyaḍ. Γas akken zzerεen ṣṣaba-nsen temɣi maca meggren-tt wiyaḍ.

Di tmunent n tmurt n Lezzayer, iεdawen n tmurt ur ɣfilen ara ṭṭfen adabu s uɣurru. Γas akken bɣan ad ḥettmen i yimdanen ayen ur bɣin, ɣas akken xelqen-d uguren i yimdanen imagdayen i ten-ixulfen, muḥal sfeclen-ten deg umennuɣ-nsen, ur knin ara i lbaṭel.

Asmi iwala udabu akken imdanen-agi tezdeɣ-iten tidet muḥal bran i tilla, qublen-ten s ulac, ruḥen slulen-d tudsiwin tinselmin, imḍebbren-nsent d imṭurfa ɣef tneslemt, sεan ahil aserti. Akka yal amḍiq sɣamen-as-id, undin-tt-id iwakken ad rẓen tanekra n yimaziɣen i yessuturen izerfan n umdan akked tugdut.

Deg tefsut n yimaziɣen deg useggas n 80, walan d akken lasel n tmurt yezga ireṣṣa. Γas zzik gezmen ljedra tura iẓuran fkan-d ixulaf. Di tnekra-yagi, imaziɣen ssutren izerfan-nsen, maca adabu amcum qqerεen-ten-id deg umennu&#611,; wa sexnunsen-t, wa εegben-t, wa… Ayagi d ayen i d-yeḍran deg tesdawit n Tizi-Wezzu.

Taxazabit n tmenɣiwt tamenzut n yimṭurfa teḍra-d ass n 2 unbir 1982 deg tesdawit n Ben-Ɛeknun di tmanaɣt n Lezzayer. Kamal Amzal yemmut d ameɣras ɣef tugdut, ɣef tmaziɣt.

Kamel amẓal ilul deg useggas n 1962 di Tiferdud (At-Buyusef), d anelmad deg tesdawit n Ben-Ɛeknun, iruḥ d asfel amenzu s ufus n yimṭurfa i iqeddcen i lfayda n ukabar-nsen daxel n tesdawit.

Tasaεet tella d 8 tmeddit, Kamal Amzal iεelleq yiwen n wulɣu di lḥiḍ. Ulɣu-yagi yessawal i unejmuε n yinelmaden i usbeddi n tesqamut ara yessuddsen leqdic. Imcaḥen n yidammen ur t-zgilen ara, acku muḥal umnen s tidet, umnen s uɣurru.

Di tjeğğigt n temẓi swezlen-as leεmer, anagar 20 yiseggasen i yesεa, nɣan-t s ujenwi wid ur nettuggad Rebbi. Kamal Amzal muḥal yekna i yimesbaṭliyen-agi, yettḥarab ɣef tiktiwin-ines i icudden ɣer yedles amazi&#611,; ɣer tlelli d tidet, ɣer tugdut akked yizerfan n umdan, dɣa yemmut fell-asent.

Kamal Amzal yemmut d ameɣras ɣef tugdut, ɣef tmaziɣt. Γas akken yemmut, isem-is yeggra-d i lebda, tiktiwin iɣef yemmut mazal ttnaɣen wiyiḍ am netta fell-asent.

Islam Bessaci