Accueil Tamazight Timecredt: ansay yeftin

Timecredt: ansay yeftin

22417

Si zman aqdim, agdud Aqbayli yurez tudert-is ɣer wansayen d leɛwayed I d-ǧǧan yimezrua. Di yal taswiɛt n lḥers, ad d-yaf amek ara yessukk leḥwal gar yinyen. Ɣas akken llan wansayen iwumi yebra umdan, imi d wid yeǧǧa lweqt, wiya&#7693,; mazal fettin, ttnernin, ddren yes-sen yemdanen. Timecreḍt, d yiwen seg leɛwayed-agi i d-irezzun ɣer tmetti yal lɛid. Yal wa amek i yettwali ansay-agi, maca ɣer taggara iswi d yiwen. Ass-a, ssawalen medden ɣer tmecredt imi aḥric ameqran ur zmiren ara ad zlun akraren iwumi tewweḍ ssuma ɣer tqacuct. Ihi, d tamsalt n tedrimt i d aɣilif, i yeǧǧan imdanen ad gen lewziɛa. di tama nniḍen, timecreḍt tesdukul atmaten, lǧiran d leḥbab. Ad d-aɣen izgaren, ad nezlun ad ten-ferqen d tixxamin, imir yal wa ad yawi amur-is. Da, ad d-nini d ansay iteẓẓun tagmat, yessawalen ɣer tdukkli. Melba ma nettu da&#611,; belli di tmecredt, ameɣbun yesɛa amur-is ɣas ma ur ixelles ara. D ta i d tagmat, d ta i d tterbegga. Tikkelt-a di Leɛǧiba, aṭas n yemdanen i iddan deg ubrid-a n wansayen, xedmen timecreḍt deg waṭas n tudrin. S kra n wid i nesteqsa, qqaren-d d akken: “Awer neffeɣ si lḥerma n yimezwura nneɣ i aɣ-d-iǧǧan agerruj n yinsayen inefɛen.” M.Smail