Akken ad sεun yimeγriyen-nneγ ugar n yisallen γef uγmis: tamurt.info,nessawel-as i mass Lyazid Abid anemhal-is yettilin di Lalman, u netta s lferḥ meqqren i yaγ-d-yefka tiririt-is.
D acu i d-iswi n uγmis-nwen?
Lyazid Abid : Tamurt.info d aɣmis (d amatu ) ara yilin s 4 tutlayin s teqbaylit, s tefransist, s talmant akked teglizit. Nessaram ad nili am lemri. Ad nemmeslay ɣef yal taɣawsa yeɛnan tamurt-nneɣ,; tamurt n Yeqbayliyen. Yerna nessaram ad nessenṭeq yal Aqbayli anda yella deg umaḍal i wakken ad yernu wafud-is ar asmi ara ibedd akken ilaq yedles aqbayli.
Amek i wen-d-tusa tikti?
Tikti… Zemreɣ ad k-d-iniɣ mačči d tikta i ixxuṣen. Ssneɣ atas n Yeqbayliyen ččuren d tikta igerrzen. Yiwen d adlis, wayeḍ d tasfifit, d asaru, tiẓrigin, aɣerbaz, rradyu, tiliẓri, atg.
Tikti n uɣmis i tumurt-nneɣ s tutlayt-nneɣ,; sumata, d yiwet seg tiktiwin timezwura i d-yettasen ɣer wallaɣ n uɣref yenḥafen, win yettnadin ad d-yini ayen i t-iqerḥen s ubrid n talwit, aya i wakken ad yesdukkel tazmert-is ilmend n tlelli-ines. Yerna, aslugu n uɣmis d wa : « Ula d nekkni nuklal tilelli ». Yerna teẓram tamurt-nneɣ teɛreḍ sdeffir n wasmi akken d-newwi zeεma tugdut-nni deg 1989, neεreḍ ad nesεu aɣmis s teqbaylit; Asalu n RCD yessuffeɣ-d 15 n wuṭṭunen; syin akin yeffeɣ-d uɣmis Amaynut n FFS, azal n 2 n wuṭṭunen kan yeḥbes; Iḍfer-d Le Pays-Tamurt yeddren azal n 5 iseggasen; aseggas n 1999-2000 yusa-d L’’hebdo n Tmurt I d-sekkren deg Bgayet Σellawa Rabḥi, Ǧamel Ixlufi, Tahar Weld Amer akked nekkini. Syin akin yussa-d Racine-Iẓuran sdeffir n kra n wuṭṭunen kan yeḥbes daɣen. Tura atan tella la Dépêche de Kabylie i itteɛraḍen abrid deg semana ad d-yaru kra n isallen s teqbaylit.
Teẓram belli tamurt-nneɣ ma yella ur tesεi ara aɣmis d akemmali s teqbaylit, d tadrimt kan i ixxuṣen. Ass-a nekni ad nfareṣ azeṭṭa n internet imi adellel d Google ara tt-iferqen, yerna ulac l’imprimerie ara d-yessutren imelyan i wakken ad d-yeffeɣ uɣmis. Ihi daya i ɣ-yeǧǧan nerra ɣer le net iwakken ad nesbed tamurt.info.
S wacu n ttawilat ara txedmem?
Allal d aselkim i icudden ɣer uzeṭṭa n internet. Maca ttawil ameqqran i nesεa d lebɣi-nneɣ,; d abgas i d-nebges iwakken ad nerr tutlayt-nneɣ am tutlayin -nniḍen, ad temmeslay tagraɣlanit. Sennig n uɣmis, nessaram ad nesbedd yiwet n tilibizyu deg internet, ara d-yemmeslayen ɣef izerfan n tmurt n Yiqbayliyen. Tiliẓri-a ad telḥu deg tazwara s kra kan isura deg internet. Ma yella tawacult taqbaylit tefka-yasen-d tameẓẓuɣt, ad neεreḍ ad d-nesbedd yiwet ara yelḥun s satilit. Akken i s-yenna Muḥya, “mazal lxir ɣer zdat”.
Amek i yezmer ad yaru yiwen deg uγmis Tamurt.info?
Aɣmis tamurt.info yeldi i yal Aqbayli yekkaten ad yeffeɣ seddaw uzaglu deg wacu i nettidir. Dacu kan akken i s-yenna Voltaire, imfelsef afransis n lqern wis-18: “Tikta-k ur tent-qbileɣ ara, maca ad ggeɣ yakk ayen iwumi zemreɣ i wakken ad tent-id-tiniḍ”. Ihi, yal win yesɛan kra ad t-id-yini, neɣ yeẓra kra yebɣa ad t-ẓren wiyaḍ,; neɣ yeḍra yid-s kra ama d lefreḥ ama d lqereḥ,; yesɛa amagrad neɣ d asaru, neɣ d ayen-nniḍen attan tansa-nneɣ. [email protected]. Seg tura ad wen-iniɣ ansuf s yisallen-nwen d tikta-nwen.
Deg wacḥal yidwen i tellam akka tura?
Aṭas yid-nneɣ,; azal n twinest (100). Atas n Yeqbayliyen i d-yerran i tiɣri-nneɣ. Ad farseɣ tagnit sya i wakken ad sen-iniɣ,; tanemmirt imi ɣ-d-tefkam tameẓẓuɣt, imi ɣ-d-tefkam afus. Dayen yessefraḥen aṭas ul. Tanemmirt i kunwi daɣen i iqeddcen deg La Dépêche de Kabylie imi ɣ-tgam ccan, tefkam-aɣ-d iccer-a n lkaɣeḍ i wakken ad d-nberreḥ s uɣmis-nneɣ/nwen ara d-yeffɣen deg internet. Ihi timlilit deg wass n umenzu n yennayer, imi ula d nekni nuklal tilelli.
Yestesa-t,MokraneChikhi