Akken nuɣ tanumi,yal mi ara d-yaweḍ wass n 08 di meɣres ttilint-d tmeɣriwin d yisaragen ɣef yizerfan n tmeṭṭut,yerkeḍ urgaz, maca ayɣer ur d-yettili ara wawal ɣef uzref n tmeṭṭut ɣer tmeṭṭut Imi yella wanda tikwal tameṭṭut trekkeḍ iman-is s yiman-is. amek? Anect-a ibeddu-d deg wass n tlalit-is :’’ ɣer ass-a n wussan mi ara ad d-terbu tmeṭṭut terna ɣur-s teqcict, mi ara kecment tlawin iwakken ad as-srebhent tarrawt neqqaren-as: ‘’ lḥemdullah kan imi tmenɛeḍ!..,.ma yella d aqcic, neqqar-as: ad t-yeg Rebbi d aɣezfan n leɛmer? Rnu ttilint teɣratin, tidet kan ula d nekkenti i yezwaren deg yiman nteɣ’’.i aɣ-d- tenna ǧuhra, yiwet n tmeṭṭut i nesteqsa.tbut ɣef waya am akken is-tenna Newwara:
Cfiɣ ɣef wasmi i d-luleɣ,;
Ur d-yelli udriz felli
Yid-wen mi d-mqabaleɣ,;
Tezzim seg-i tamuɣli
Tennam i yemma selleɣ :
Rebbi ad kem isebber a yelli.
ɣer waya, yella wanda mazal ɣer ass-a taneḥyaft daxel n twacult taqbaylit ger uqcic d teqcict;ad naf tayemmat d temɣart ttmalent aṭas ɣer warrac wala tiqcicin, ula di tgella, ad tent-naf ttbudunt arrac ugar n teqcicin!.ula d tacennayt Newwara tecnat deg yisefra n Ben Muḥemmed :
Asmi bdiɣ la ttnerniɣ,;
Ḥulfaɣ ziɣ yella leḥyaf
Taqaɛet-nni ideg ɣliɣ
tettdeggir-iyi-d ɣer leryaf
Di mkul taswit ttwaliɣ
Ala arrac i nessmenyaf.
Ur yeqqim ara kan werkaḍ n yizerfan n tmeṭṭut di twacult-is n tlalit, ula mi ara tezwej aɛdaw-is amenzu n tmeṭṭut d tameṭṭut, imi ɣer ass-a amcečču d win yezgan ger temɣart d teslit.imi tamɣert tḥemmel ad tili dimma d timḍebbart ɣef teslit.tislit daɣen yella wanda ur tɛeffu ara i temɣart.. Ihi yella wanda tikwal d tameṭṭut i yezwaren deg yiman-is uqbel ad d-awḍen wiyaḍ ɣur-s,am akken is –tenna tgelzimt i tzemmurt:’’ afus deg-wen ay isɣaren ‘’.
B.Benhamouche