Brizil ad turar mebla Ronaldinho D ayen i d-iwekked usleγmay n terbaεt n Brizil Carlos Donga,εlaḥsab-is netta asufeγ n umyurar-a agreγlan, yella-d s sebba n usubu n uswir-is deg le club(aqusis) n Anter-Milan ideg yetturar akked d temliliyin n usewjed i Lmundyal. Taqbuct n umaḍal ad tezzi i Tefriqt-Wadda I teγzi n Lmundyal 2010,adabu n Tefriqt-Wadda iheyya-d yiwet n tikli ideg taqbuct n umaḍal ad tεeddi akk γef temdinin n tmurt.D ayen ara yefken tagnit i yinadalen akked wudmawen imeqranen n tmurt-a akken ad tt-refden wa ad ggen yid-s ttsawer. Imnasren n Tefriqt-Wadda ẓumen i terbaεt-nsen Aṭas seg yimnasren n terbaεt n Tefriqt-Wadda i yextaren ad sbegnen asaned-nsen i terbaεt-nsen s tγimit n yiwen n wass mebla lqut akked ccrab.Llan ula d wid i yeẓẓulen akken ad tenǧeḥ terbaεt-agi-nsen, imi ttwalin belli »Lmundyal ixeddem-d lmuεǧizat ».
S anda yessaweḍ umennuɣ n Mandéla I tikkelt tamezwarut, taqbuct n umaḍal n useggas 2010 ad uraren fell-asen di Tefriqt. Maca anta tamurt ? Di tmurt i d-yeffɣen melmi kan seg yiwen n lḥers akked ṭṭrad gar warraw-is. Yennuɣ uberkan mgal acebḥan, maḥyaf iɛedda tilas. Imi tamurt-agi tesɛa-d yiwen n urgaz iwumi qqaren Mandéla, yesneqlab taswiɛt, isebbel temẓi-s iwakken ass-a Tafriqt n Wadda ad tezdi lqedd-is gar tmura yerna tessaweḍ almi i d- tesnubeg tirebbaɛ n umaḍal ad urarent deg ukal-is. Win iteddun ɣef tidet yessawaḍ ! Argaz-agi, yegguma ad yessusem ɣef lbaṭel yesberbren ɣef yiberkanen, yettuḥeqren di tmurt nsen. Yuɣ abrid n umennuɣ, ɣas akken yeḥsa belli ur yeshil ara. Maca, yumen d akken ɣer yiwen n wass ad yessuzef lḥif ɣef yimeɣban. Am wakken i tt-yenna, i teḍra. ɣas iḍul umennuɣ, ɣas yettwaḥbes azal n 28 n yiseggasen, yerra timedlin i « L’apartheid ». Amek ihi ur d-neqqar ara aya, imi win akken yeddren di lḥebs yuɣal d aselway n tigduda. Ur yelli ara seg wid yectaqen akersi, maca segmi yessaweḍ yesserked liḥala s tefranin di yal aswir, anda yettekki uberkan ɣer yidis n ucebḥan, yerra talast i leḥkem-is, yessawel ɣer tfernin n tselwayt uqbel lawan. D ayen yernan di ccan-is ! Tikkelt-a, aṭas i yurǧan ad yeḥḍer i temlilit tamezwarut n « les Bafana Bafana », maca, yeɣli-d fell-as leḥzen am wabbu, amzun uran fell-as yiɣeblan. Akken yebɣu yili, Mandéla ɣer 92 n yiseggasen di lɛemr-is, mazal ttwalin-t yemdanen d azamul n tugdut, n yizerfan n umdan, d win ur neɛciq deg ukersi.
M. Smail.