Ass n lḥed iεeddan 26/06/2010, Asqamu Unnig n Timmuzγa (HCA) yerra tajmilt i ‘’uḥeddad n wawal’’ Méziane Rachid deg uxxam n yidles Mulud Mεemmri di Tizi Wezzu.
I lmend n waya tella-d yiwet n temsikent γef leqdic n unaẓur-a akked yiwet n temlilit d yimeddakal-is anda i as-rran tajmilt, gar-asen : Medjahed Hamid, Habib Mouloud, El Djida Tamechtouhth, Tayeb Brahim, Merzouk Rachid…d wiyaḍ.
Ilul Yala M’Hamed i yettwasnen s yisem Meziane Rachid ass 27/02/1944 di Lezzayer tamanaγt (di Casba). Imawlan-is ussan-d seg Uẓeffun di lwilaya n Tizi Wezzu.
Meziane Rachid yura ugar n 1000 n yisefra d tezlatin, iẓawanen, tidwilin n radyu akked ticeqqufin n umezgun. « Serge Gainsbourg algérien » akken i as-ssawalen yimeddakal-is yettwassen mliḥ s tezlatin-a : Faḍma n Sumer, Ma d awal, Ugade&gamma,; Ssendu (yecna Idir), Ad ak-wessiγ a mmi εzizen (Nouara), Lmeḥna-w (Youcef Abdjaoui), Ay aḥeddad (Samy El Djazaïri).
Ma d tidwilin yexdem di radyu nezmer ad d-nader : Iγennayen uzekka, Sbaḥ lxir, Timlilit, Amcic deg uqelmun, Awal, lkar n Tizi nTlata, Aγerbal…
Tajmilt-agi d yiwet n teswiεt anda aṭas n yimdanen mlalen u snen udem n Meziane Rachid i tikelt tamezwarut. « Yettban ur iḥemmel ara ad d-yesbin iman-is ; ixeddem taẓuri i tẓuri ur yettnadi ara γef cciεa » i d-yenna Abdenour H.S.
« Amek anaẓur akk am wa, mmi-s ur yessin ara taqbaylit ? » i yesḥassef yiwen gar wid iḥedren i temlilt-a.
Lhocine Ourezki.