Si Mohand Saïd iḥekkud Amγar, d asentel n wedlis amaynut umezruy n tegrewla tazzayrit u d inigi γef umecwar n colonel Mohand Oulhadj i yuγalen deg wemḍiq n Σmiruc, d netta i d imḍebber aneggaru n temnaṭ tis III, seg useggas n 1958 ar 1962. D netta i yessulin asenjaq n tmurt n Lzzayer ass n 5 yulyu 1962 i temnaḍt n Sidi Ferrej anda id-tres Fransa ass unekcum-is γer tmurt n Lzzayer ass n 5 Yulyu 1830. Adlis-agi yefeγ-d ass n 02 yulyu yezrin i lmend n umuli wis 48 n timunent n tmurt n Lzzayer. Akli Mohand Said, mmi-s n Colonel Mohand Oulhadj, imḍebber amzarwan n lwilaya tis III, yesufeγ-d adlis i tizrigin Le Savoir i temnaḍt n Tizi-Wezzu s usentel Si Mohand Saïd iḥekkud Amγar (Si Mohand Saïd raconte Amghar). Tazwart n wedlis-agi yura-tt mass Chérif Ould El Hocine d aγalat n ALN i Lwilaya tis 4, u daγen d amyaru id-yuran yakan yiwen wedlis s wazal-is, asentel n wedlis-agi Deg ul umennuγ (Au cœur du combat) anda yuγal γer wussan ntegrewla tazzayrit. Adlis-agi yesεa ayen yugaren 300 isebtaren, yebḍa γef waṭas n yaḥricen, yunnag-d γef deqs n temsal. Amyaru yeḥka-d albaṭel texdem Fransa i zzayriyen sumata, seg yidis niḍen ijerred-d amecwar n Colonel Mohand Oulhadj imḍebber n Lwilaya tis III almi d timunent. Adlis-agi d amarkantis tṣawar n tegrewla, akk d iγalaten, imḍebren, imaγrasen n tegrewla akk d Colonel Mohand Oulhadj.
Ass n 2 yulyu 2010, aṭas n yemdanen id-iqesden axxam n yedles n Mouloud Mammeri n temnaḍt n Tizi-Wezzu, anda id-tesudes tizrigin Le Savoir n Tizi-Wezzu azenzu n ibuden (vente-dédicace), meslayen akk d wemyaru-agi mass Akli Mohand Said, uγan daγen adlis-agi s waṭas
Islam Bessaci