I tikelt-nniḍen, imezdaγ n tmurt n leqbayel ugin ad as-knun i ddel. Ddurt iεeddan, mbeɛd mi yettwaxḍef yiwen n umdan di taddart n Tala n Tgana si tama n Freha di lwilaya n Tizi Wezzu, kkren yimezdaγ n temdinin Timizar, Aghribs, Azeffoun d Azazga dduklen am yiwen n urgaz, gren tiγri i wid ixeḍfen mmi-tsen iwakken ad as-d-serḥen : d ccix n lğameε n taddart-nni i yettwakelfen s waya, iberreḥ-d s uṣawaḍ.
Ilmend n temsalt-a, tlul-d yiwet n tesqamut i yettnejmaεen yal ass akken ad walin amek ara ssedduyen lecγal alamma yettwaserreḥ-d Lounes Ibirar i yesεan di leεmer-is 33 n yiseggasen.
Imawlan n urgaz-a ugin ad d-inin ma d tidet ḍelben-asen-d neγ ala 3 n yimelyaren γef wakken i d-yeffeγ wawal.
« Ur nḥebbes ara anadi fell-as alamma nerra-t-id. Ad nexdem akken xedmen Yiflisen » i aγ-d-yenna yiwen iḥedren i unejmuε-nni n wass n ttlata iεeddan di Freha.
Lhocine Ourezki.