Taddart n yIger ansar deg tɣiwant n yIflissen n lebḥer i-d yezgan ɣef teɣzi n 50 km tama n ugaffa n twilayt n Tizi Wezzu d tin yettidiren deg yir liḥala s sebba n lixsas n waman. Seg useggas n 1998 ur d-tuddam tiqit ɣer yixxamen, xas akken amur ameqran n tudrin n tɣiwant-a iferreǧ Rebbi fell-asen deg useggas yezrin. Tineggura-agi, sfaydant s waman mi akken i d-yella usenfar n ucuddu nsent s abaraǧ n Taqsebt.
Ma d imezdaɣ n taddart n Yiger, mazal-iten nḥafen, imi ḥala di ccetwa i ttafen aman n tliwa, d acu kan leɛwanṣer-agi ttɣaren mi ara d-yaweḍ unebdu. D ayen iten-yettaǧǧan ad ttaɣen tisiṭirin n waman s ssuma ɣlayen. Liḥala- agi d tin yessewhamen ladɣa mi neẓra belli tudrin yesɛan waman d tid i s-yezzin. D ayen yeǧǧan imezdaɣ-is ad gren tiɣri ahat, imḍebbren terza taluft-a, ad d-rren lbal nsen iwakken ad frun aɛewwiq-agi.
Dalila.I