Taggara agi imsexdamen n l’Internet ggten, simmal d anerni. S ttawil n l’ADSL yuɣal wallal agi ikcem ɣer yixxamen, uɣalen yimdanen ur ḥwaǧen ara les cybercafés iwakken ad kecmen ɣer uẓeṭṭa n le Web ad qḍun tiɣawsiwin nsen. Yal wa d acu n lebɣi i d yettaf deg uḥric agi n taywalt ( communication). Yennulfa d yiwen n wudem n taylawt yezdin gar yimdanen di dunnit meṛra s ttawil n les sites yesseqraben gar asen am « facebook » neɣ asali n les blogs. Deg tirza nneɣ daxel n uẓeṭṭa agi, nufa aṭas n yIzzayriyen i iḥemlen ad ssudsen les blog nsen iwakken ad d- inin kra ɣef timadit nsen, neɣ ad ssiwḍen tiktiwin nsen ɣer yimdanen n temnaḍin nniḍen. Nestqsa yiwet gar asen akken ad aɣ-d-tini tikti s ɣef cɣel agi, amek i tettwali ttawil n l’Internet d wacu n lfayda yellan deffir n usbeddi n les blogs.
Acu i am- id- yettawi le Net deg tudert – inem ?
Cukkeɣ yettawi-d ayen nniḍen ixulfen tilawt. Deg targit n le Net nettserriḥ i yixfawen nneɣ akken ad mlilen d timadit nsen mebɣir ifeṭṭiwjen yestullusen tidet, yesserwalen iman ɣef yiman is. Tikwal nettḥulfu s yiman nneɣ zun nɛawed talalit,nuǧew-d ismawen ijdiden, wid iɣ id -inejren abrid nniḍen akken ad nili nekni d wiyiḍ, am wakken i nettḥulfu s itdet, mačci am waken i ilaq. Lxuf yebṭel, tilelli tettili dɣa yal wa yettaf ayen i t ixuṣṣen deg tudert is n yal ass.
Aya d acqirrew neɣ d nmara?
D tabɣest ? Ur ẓriɣ ara. Meɛna mi ara nmuqel ɣer les blogs xeddmen Iṛumyen, nettaf belli nutni ttmeslayen ɣef wayen akk i ten- yeɛnan mebla akukru, ḥemlen ad d- inin timeẓyanin d tmeqranin iten iceɣben. Ɣer ɣur-sen ur yelli lɛib deg wannect a, ma da ɣer neɣ cukkeɣ imdanen ttkukrun ad d-bedren tinekkit nsen acku leqyud mazal kersen, tilelli n yixfawen mazal ur d- telli ara, rnu ɣef wannect a timetti ideg nettidir tewɛer. Degmi leḥder ɣer tura mazal d netta i d ameskan n wacu ilaqen ɣef umdan ad t id-yaru deg lblog ines. Akka, yiwet am nekk xas ceɣbent -iyi kra n temsal beqquɣ ad tent id- iniɣ, lameɛni reggleɣ- asent, amer I d- qqaren medden ! Ur bɣiɣ ara ad « ccukiɣ » wiyad, akken neqqar ihi nteddu s lemḥadra.
Acu i yesmendigen imdanen akken ad mmeslayen ɣef tinekkit nsen ?
Deg tidet yal amdan yassaram ad iḍleq tinekkit ines zdat wiyaḍ. Ayen ala ? Ur cukkeɣ ara ayen nni d acqirrew neɣ d anamar, di yal tallit di yal zman di yal amkan amdan iḥemmel ad d- yesken iman is. Maca, aya di tudert n yal ass ur yelli ara d afessas, degmi ttawil n l’Internet yessishil lecɣal, wid yessexdamen ttawil agi ttafen-d tagnit iwakken ad mmeslayen ɣef yiman nsen d yixf n yiman nsen. Nekk cubaɣ ayen nni ɣer usteɛfu. Amdan, mi d- iger nnehta yesrusuy taɛkemt n tudert.
Tella tilist gar targit n l’Internet akked tilawt ?
Xas tella yakan tilist, ad teḍhu rqiqet. Temyekcam targit akked tudert n yal ass. Imsexdamen n l’Internet d imdanen n tidet, sɛan iḥulfan, kesben tidmi. Xas ma ttefren deffir n les pseudos lameɛni llan d nutni i yettarun i yettmeslayen, i d yeqqaren timsal ɣef i d- yezzi wawal. Simmal yettaf umdan ayen I t ixussen deg-s, simmal yettnadi fell as alamma tuɣal as d yiwet n tɣawsa ara yesɛun azal deg tudert is. Xas ini tettuɣal d ddunit n yinig uɣur irezzu yal mi ara yebɣu ad yessenser iman is seg yiɣeblan i d yettmagar deg tudert n yal ass. Ɣef aya, nezmer ad d-nini belli l’Internet yelha i kra, am wakken ur yelhi ara I win ur nesɛi ara tilist ara yexdem i yiman is s lebɣi n lebɣi s.
Ait Slimane Hamid