Accueil Tamazight Tajmilt i Mustapha Anane

Tajmilt i Mustapha Anane

1855
- PUBLICITÉ -

Deg yimalas yezrin, tawacult n waddal sumata, ladɣa tarbaɛt n leqbayel JSK, temḍel yiwen seg warraw-is i teḥwes tmettant uqbel lawan. Wagi d Mustapha Anane, ad fell-as yeɛfu yerḥem. Aniwa aqbayli ur nsuɣ ara s yisem n Mustapha deg tallit n yiseggasen n 70, asmi akken imyurar n JSK tturaren ɣef teqbaylit, ssawaḍen izen n temnaḍt ɣer twilayin i merra almi wwḍen ula ɣer tefriqt ama d agafa neɣ d anẓul.

- PUBLICITÉ -

Mustapha, ad d-yeggri deg umezruy imi d netta i yesmenɛen tarbaɛt-is ur teɣli ara s aḥric wis-sin asmi akken yura iswi n wureɣ sdat n terbaɛt n Constantine deg wakal-is. D ayen i yeǧǧan ass-a JSK ḥala nettat ur neɣli ara seg uḥric amezwaru. Degmi ur aɣ-yettamaḥ ara umyurar-agi ma yella nettu-t.

Deg 19 yunyu 1977, s kra n win yecfan neɣ iḥeḍren, walan iseɣ n Mustapha Anane, d nnif iɣef yesseḥbaber iwakken ad yessefraḥ iqbayliyen. Yessew timerzuga i yimyurar n terbaɛt taxṣimt mi akken yekker uhetwir : « Anwi wigi ? »

Segmi akken i tḥemlen medden, yal wa amek i ihedder fell-as. Kra qqaren-d d akken mi ara iḍegger ddabex ɣer sdat ad tt-yezmir mi ara yaweḍ. Wiyaḍ qqaren yezmer ad yettazzal mebla asteɛfu kra akk ara teddu temlilit. Lḥasun leqder yekseb ɣer yimdanen yessali-as di ccan, netta ur yebxil ara.

Ass n temḍelt-is, usan-d medden seg yal tama iwakken ad ḍillen ɣef wudem-is i tikkelt taneggarut. Yal wa yettmektay-d annar n Oukil Ramdane akked umenzu n wunbir, anda yesɛedda umyurar tudert-is.

S tidet, yers-d leḥzen, imi tamettant n Mustapha terna-d ghef tin n Kamel Aouis, ula d netta yuklal tajmilt.

Am wakken i qqaren, mačči d lmut i d aɣilif ameqran acku d ayen yerǧan akk imdanen, maca ayen i iweɛren d tatut n win yemmuten. Mustapha yura isem-is deg umezruy s yisekkilen n ddheb, ur yemir ḥed ad ten-yemḥu. Ṭṭes di talwit !

A.A

- PUBLICITÉ -