I tikelt tamzwarut i yas-tuγal tejmilt meqqren i umeγras Σebban Remḍan.Ilmend n usmekti n umuli wis 56 n tegrwla n uslelli n tmurt,yettwaldi di Taddart-is Iεezzuzen,taγiwant n Larebεa n at Yiraten usalay yewwin isem-is. Tulya n usalay-a, tella-d s leḥḍur n luluf n yimdanen i d-yusan seg yak timnaḍin n tmurt n Leqbayel,aya mebla ccek yesbeggin-d azal i yesεa ubabat n uzarug n Lezzayer(am wakken i as-ssawalen) deg wulawen n yiqbayliyen.Tameγra-ya daγen,ḥeḍren deg-s waṭas n wudmawen n umezruy d tsertit n tmurt-nne&gamma,;d twacult n Σebban Remḍan d waṭas n yimḍebren n lwilaya n Tizi Wezzu d waṭas n yimjuhad akked yineγmasen n ttawilat yemxalafen n yisallen. At taddart n Iεezzuzen,xtaren axxam n umeγras akken ad yuγal d asalay.Ssawḍen ad t-id-swejden s lemεawna n tγiwant n Larebεa n at Yiraten d tenmehla n yidles n lwilaya n Tizi Wezzu deg agur n yunyu 2010.Di tazwara nwan ad t-ldin deg ass n 20 γuct yezrin d asmekti n ugraw n Ssumam yellan d asenfar n Σebban ideg d-yefka tiẓri-s inefεen amussu aγelnaw n yimiren d Lezzayer n wass-a.Maca s sseba n kra n lecγal n ureqqeε akked d wawaḍ n wagur n remḍan,tettwawexxer tmeγra n tulya γer umenzu n unbir.Aγmis n La Dépêche de Kabylie, yella d inebgi di tmeγra-ya,anda amendid-nneγ n lbiru n Tizi Wezzu mass Khaled Zahem iga-yas tadiwennit i uselway n lkumiti n taddart n Iεezzuzen mass Nacer Abib ideg d-yemmeslay γef wamek d-yella uheyyi d wazal i tesεa tmeγra-ya(ẓer DDK n 01/11/2010). Deg awal-is mass N.Abib yenna:”Tameγra n tulya n usalay Σebban Remḍan,d tagnit i useggem d usekfel n umezruy-nneγ n tidet.Σebban,yettuneḥsab d azamul n umezruy n tmurt-nneγ segmi i tenγa-t yiwet n terbaεt n umussu aγelnaw di Tètouan(Lmerruk) deg ass n 27 dujember 1957”.
Ma yella d asalay,yesεa snat n tzeγwa ideg temmug temzikent n tsawer d lekwaγeḍ yesεan assaγ d tegrewla n54.Rnu γur-s timkerḍit ideg llan yidlisen n umezruy n tmurt-nneγ. Ula d ttawilat n yisallen n ddula,rradu taγelnawt akked tilibizyu,ḥeḍren s lqewwa di tmeγra-ya,ideg d-ssawḍen isallen srid seg umkan.Aya γas ma mazal ixus umeslay γef urgaz-a mucaεen imi tamsalt n tmettant-is mazal-itt teqqim d aṭabu ara d-yekcef umezruy deg yiseggasen ara d-yasen(mebla ccek!).Yuγ lḥal aṭas i d-yemmeslayen fell-as,aneggaru d Abdelkrim Hassani(amasay amezwaru n lesrar n tegrewla,aεeggal deg l’MALG),netta iwekked-d deg yiwet n tdiwennit i yas-iga deg agur n tuber iεeddan yiwen n uγmis n tmurt i d-ittefγen s taεrabt,belli”Σebban i t-yenγan d tarbaεt umi sawalen (les trois B),acku ttwalint d amihi zdat-nsen”. Akken yebγu yili lḥal,amezruy d lmuḥal ad yesfeḍ lğerḥ yecban wa,tamurt n Lezzayer d lmuḥal ad tesber γef ubabat-is n tidet i tt-id-yeksen i urumi,i yas-yebnan lsisan iγef ara tbedd,imjuhad n tidet yeddren armi d ass-a d lmuḥal ad ttun win i ten-yerran d ugen yesεan nniḍam,yesεan leqder ula ger leğnas.
Mokrane Chikhi