Tameddit n wass n lexmis yezrin, tazeqqa n Atlas i d-yezgan di Lezzayer tamaneɣt ur tessaweḍ ara ad teldi tibbura-s i yimdanen akk i tt-id-iqesden. Aṭas i yuɣalen s ixxamen nsen s wurrif, imi ur asen-tettunefek ara tegnit ad ẓren win akken iteẓẓun asirem deg wulawen, ileddi allen. Lounis Ait Menguellet, imi d wagi iqesden medden ɣer Atlas, yessuzen mačči d yiwen s yimeslayen ḥlawen.
D amedyaz ! yuɣ abrid n tjaddit, imi s wayen akk itedder tmurt ur yelli kra i t-yessenhezzen iwakken ad imal ɣer tama mgal tayeḍ, ḥala lbaṭel i yugi. Aniwa ur necfi ara deg yiseggasen n 90, asmi akken ugin at ičumar ad yecnu dɣa di tzeqqa-agi n Atlas. Ass-nni i d-yenna yiwen n wawal s wazal-is : « je ne suis pas un homme aux solutions faciles ». yugi ad isers agambar-is. Yeggul ad yecnu, yecna. Ur yugad, ur yekkura, ibedd deg wudem n yimesḥaf.
Ass-a, mazal Lounis deg ubrid-is, isserreḥ i waman ad lḥun. Yesdukkel di tzeqqa tisutiyin. Ayen i d-rennun abruy n lemleḥ di tmedyazt-is mi akken d tin iḥuzan ameẓyan d umeqran.
« Siwa telteyyam di lɛemr-iw » d tizlit ijebden lwelha n yal aqbayli, mazal-itt tedder, imi mi akken i tt-yecna akked mmi-s Djaâfer tessaki-d acḥal d asmekti.
Seg yiseggasen n ddheb alamma d anda iserreḥ i waman tɛeddiḍ-d ɣef Uqbayli, Lounis yesqerdec yal tamsalt. Ur yelli d win kan i d-yessukkussen ayen ixuṣṣen di tmeti, maca yal tikkelt iberru-d i tifrat, akken i tt-iwala, mebla ma yesseḥres di rray-is : D amagday !
Acḥal n tlufa i d-yecna, yerna ḍrant, am akken yella acu n lmelk i d-yersen fell-as : Aniwa ur necfi ara ɣef : wwet-as ṭṭbel a Ɛliluc ? taggara, tban-d deg umussu n leɛrac. Neɣ ay Aqbayli n yiseggasen n 80, tuɣal tban-d gar leqbayel ufella d wid n wadda. Mačči d yiwet iwakken ad –tt-id-nebder, d acu kan ad d-nini : D amɣar azemni !
Akken yebɣu yili lḥal, skud mazal Lounis, mazal asirem.
Sylia.M