Tawaγit tamenzut, teḍra-d i taddart n Mḥegga taγiwant n Idjeur, labaεda imi yiwen n yilemẓi yesref-d fell-as yiwen n lḥiḍ n wexxam. Wagi d mass Messad Ghilès, yiwen ilemẓi i yesεan 17 n yiseggasen deg leεmar-is, d anelmad di Tusnawit n watmaten Hanouti deg Lewḍa, deg seggas wis sin (2eme année génie mécanique), yemmut labeεda imi d-yeγli fell-as yiwen n lḥiḍ n wexxam aqdim. Ghilès yella yella yettεawan deg uhudu n temzduγt-agi taqdimt akken a s-εiwden lebni amaynut, maca lmut taγeddart tecelqef Ghilès ur-yebni fell-as, γlin-d fell-as yedγaγen din kan teḥbes tudert-is, Ghilès yemmut, yewweḍ s anda ara-nawweḍ. Ghilès meḍlen-t ass n sebt yezrin 08/01/2011 i tmeqbert n taddart-is Mḥegga taγiwant n Idjeur anda i d-ussan aṭas n yemdanen ḥedren i temḍelt-is, am yemdukkal-is n tesnawit, iselmaden-is d wiyaḍ niḍen. Tawaγit niḍen i d-yeḍran, d yiwet n tmeṭṭut n taddart Ibuyisfen taγiwant n Wizgan i yesεan azal n 50 n yiseggasen, uffan-tt temmut s ddaw n tzemmurt. Tameṭṭut-agi tuγ tanumi t-tteffeγ tleqqeḍ azemmur i teẓgiwin-is. Tikkelt-agi tefren a d-telqqeḍ azemmur imman-is deg yiwet n tmazirt i yellan teqreb nezah γer taddart Ibuyisfen, maca lmut tezwer-as-d tewwi-tt, uffan-tt waḥd-s teẓẓel s ddaw tzemurt. Tamḍelt-is tella-d as n lḥed yezrin 09/01/2011 i tmeqbert n Ḥebci n taddart Ibuyisfen.
Islam Bessaci