Mi akka yekker uhetwir di tmura tiǧiratin, Lezzayer yela yakan ters ɣef yirij tugad ammar ad tt-id-yenṭeḍ ujeǧǧiḍ. Ihi, imḍebbren teqqes-iten taggent, ttnadin amek ara ssifarren “tsunami” ɣef yiqerray nsen. Maca, nwulef, yal tikkelt aniwa ara d-yefɣen s yisalli d amenzu. Yerna, neẓra daɣ, ṭṭuqten yimḍebbren ɣef lbabur, d ayen i t-yeǧǧan ɣef tizi n lɣerq, ad d-yennulfuTiṭanik wis-sin. Dɣa seg tejmeɛt n lumma i d-yesṭerḍeq aɛbar ufus azelmaḍ n uneɣlaf amenzu. yenna:”d lmuḥal ad tettwikkes liḥala n lḥers, skud akka mazal rrebrab di tmurt.” Akk iɣmisen ssawḍen-d isalli-agi, izad ccekk di tmetti, tebda trekkem tasilt. Uqbel wagi, d aneɣlaf Ould Kablia i d-yennan:”Ur zmireɣ ad d-mmeslayeɣ ɣef taluft-agi skud ur tɛeddi ara deg usqamu n yineɣlafen.” Meqqar wagi, yeǧǧa-d kra n usirem.
Deg unejmuɛ n usqamu-agi ihi, aselway n tmurt igzem-itt di rray d akken liḥala n lḥers ad tettwakkes mebla leɛḍil.
Dagi, acu i izmer uzzayri ad t-yefhem ? Mebla ccekk, Bouteflika yebɣa ad d-ibeggen belli d netta i d amḍebber, ur yezmir ḥed ad d-yemmeslay deg umkan-is. Am wakken daɣ i nezmer ad nefhem d tagnit i ifures iwakken ad yesseɣli widen akken yebɣan ad ṭṭfen imukan s yiɣil.
Ma d nekni, ad d-nini kan i wid yettheggin iwzan uqbel ifrax awal i d-yeǧǧa Lwennas:” Ur ttgalla, ur ḥennet, deg wayen akk ur tetḥeqqeḍ ara”.
Sylia. M