Ass n 4 di furar iεeddan, yeγli-d leḥzen d ameqqran deg uγerbaz Alliche Youcef imi temmut yiwet n tselmadt mbeεd mi yeḥbes wul-is. Aggur uqbel, yemmut gma-s. Inelmaden n uγerbaz-a, ḥemmlen aṭas tacixet-nsen, ḥussen-as mliḥ i tyita, ihi kkren rran-as tajmilt di ddurt-nni. « Mi kecmeγ γef 9 γer yinelmaden n uswir wis 4, ufiγ-ten la ttarun isefra d kra n wawalen swayes ara rren tajmilt i tselmadt-nsen. Syin ruḥen γer unemhal akken ad asen-d-yefk ttesriḥ. Γef 12, mlalen-d akk inelmaden, iselmaden d yixeddamen di tlemmast n uγerbaz. Tekker di tazwara tnelmadt Katia tesmekti-d amecwar n tselmadt yemmuten Massa Adouche i iḥemmlen aṭas inelmaden-is, syin rnant-d snat-nniḍen, Malha d Dehbia i d-yeγran isefra d-heggan inelmaden i lmend n waya. Acu kan ayen d-yessrun mliḥ wid akk yellan din, d tizlit-nni n Matub ‘’Si ddunit akk ad neffeγ’’ i d-yecna Lhadi s tgiṭar-is akked Dehbia ». S yimeṭṭawen i aγ-tt-id-yeḥka, ula d ass-a, Ramdane Lasheb, aselmad n tmaziγt deg uγerbaz-a.
Am wakka, inelmaden ceffun i lxir. Akken i as-yenna Ccix Muḥend :’’tin tundiḍ ad ak-teṭṭef’’.
Hocine. M