“A widak yeɣran, s yifassen n yimeɣban, ssizdget taswiɛt” deg yiseggasen n sebɛin i d-tuɣ aẓar tegrawla n yelmeẓyen di tesdawiyin. D urrif i ten-id-yesneṭqen, ṛwan amdegger ɣef ulac: ulac leqraya, ulac tamusni, ulac leqrar, ulac diplôme, ulac lxedma, ulac, ulac, ulac…ar melmi ara tdum akka? Win i d-yusan d aqerru ad asen-yesseṛwu tingara, ctaqen ad d-tres lehna, ad ɣren akken ilaq, yal ass d acu ara sen-d-yesnulfu llakul n Lezzayer yeḥfan…
Zik-nni neqqar aḥlil win ur neɣri, neḥseb leqraya am tmegḥelt ɣef tayet…
Tura, win yeɣran ahbuh, win yeqqimen ahbuh, akken xedmen ulac tawwurt. Cuuuuuut ! Anfet ad d-hubben leryaḥ, ad yefru lḥeb ɣef walim, ad iban weḥrur, ad iban uḥerri, ad iban wakli… Hubbet-d a leryaḥ, ɛyan yelmeẓyen seg wid i ten-yekkaten s uɣebbar s allen Hubbet-d a leryaḥ, ad d-nnunten imusnawen, widen-nni izeggiren i lqum, wid-nni yemmalen abrid yettawin, di Tmurt n lxali. Seg wecrured ɣer tikli, tikli n tmusni, tikli n tlelli, tikli d ufennan… Ur ttagadet ay at laɛraḍ ! Ibaaaaaaaaaaan usigna s-tekkat! ur telli din tsertit, ur telli timmuhbelt, ur yelli wemkerrac, ur yelli udebbuz, ur yelli win ara ibeddlen lbista-s, ur yelli win ara yezzenzen idammen-nnsen. Tikelt-a, tikli-nnsen d acrured, tikli-nnsen d tira ɣef wakal, akal d idammen, idammen d laṣel, laṣel d tilin, tilin d tinin, ad d-inin i ten-yerḥan, tixret ad d-hubben leryaḥ ad ssizdgen taswiɛt …
Zira