Ur nezmir ad d-nebder 19 di meɣres mebla ma nerra lwelha ɣer yiwen seg wid ijerden timunent n tmurt n Lezzayer. Ass yecban wa, iressan deg wallaɣ n yal azzayri ibeddel tikli d tmuɣli i tmurt yurzen azal n 132 n yiseggasen. Letfaq n Evian, yerra talast i lhers, yessufeɣ leɛtab n yizzayriyen ɣer tafat. Maca, widen akken iqublen De Gaulle d imdanen yumnen s wayen i ixeddmen, yerna kesben tabɣest ijehden. Tarbaɛt yennuɣen, yemmeslayen yella-d ɣef uqerruy-is yiwen n umsedrar, iwumi tǧa fransa isem n «le lion de Djurdjura».
Krim Belkacem, imi d wa i d izem n ǧerǧer, ilul ass n 14 di ctember 1922 di Draâ El Mizan. Yewwi-t baba-s ɣer tmaneɣt anda yeɣra iwakken ad yessiwed ɣer taggara n uswir amenzu (certificat d’études), yerra-t-id ɣer taddart anda yebda lxedma deg tɣiwant. Tiktiwin-is ɣef lihala n tmurt ssaǧdent baba-s i yuɣalen yettaǧad ɣef tudert n mmi-s, dɣa yuzen-it iwakken ad d-yesɛeddi lɛesker am netta am tizyiwin-is. Di taggara n useggas n 1943, yekcem Krim s akabar n PPA, anda yebda ilemmed tasertit. Asmi walan Irumiyen d akken d yiwen n urǧaz i izemren ad yawi yid-s imdanen, ssawlen-as deǧ useǧǧas n 1947. Maca, yegguma ad yerr tudert-is deg yimi n yizem, yerfed iman-isɣer umadaɣ anda yettidir di tuffra. D ayen i t-yeǧǧan yexdem kra n tqullaɛ i watas n yimdebbren n fransa. Deg useggas n 1950, yuɣal d amdebber ɣef terbaɛt n PPA-MTLD anda llan lawan –nni azal n 22 n yiserdasen.
Ɣer tama n Ouamrane, yelmal ass n 09 di yunyu 1954 akked Didouche, Boudiaf d Ben M’hidi anda i mmeslayen ɣef tnekra n tegrawla. D tin i d ssebba i t-yessawden iwexxer ɣef Messali iwakken ad heggin tanekra i tegrawla. Mi tenhewwal tegrawla, yuɣal d aqerru n temnadt n Leqbayel. Akken kan yekfa uǧraw n Ssumam, yerna di ccan iwakken ad yuɣal d argaz wis-sin n ǦPRA. Asmi i tefra teǧrawla, yugi ad yeqbel asqamu yettwasbedden n FLN, imi yugi rray n Ben Bella. Di 1965, asmi i d-yuli Boumediène ɣer leḥkem, ibedd Krim mgal iɣil yettwasxedmen, d ubrid i d-wwin widen yewwḍen ɣer tqacuct. Yunaǧ ɣer Lalman mi akken i as-sbabben aɛrad n tmenɣiwt n uselway Boumediène, almi i as-ḥekmen s lmut.
Deg wass n 18 di tuber 1970, yettwanɣa di Franckfurt, daxel n texxamt n usensu anda yettidir. Ass n 24 di tuber 1984, nuqlen-d iɣsan-is ɣer tmeqbert n yiɣersiwin.
Akka i d taggara n tudert n win akken i d-iɣedlen rrehba deg yirumyen ikesben lawan-nni yal ttawil n tegrawla.
Sylia. M