Ddurt-agi yezrin, ass n 14 maγres, tamehla iweszla ametti (Direction des affaires sociales) n lwilaya n Tizi-Wezzu sudsen-d yiwet n tmeγera s wazal-is deg tzeqqa n wexxam n yedles n Lmulud At Mεemmar n temdint n Tizi-Wezzu, ilmend n wass aγelnaw n yimeεdar. Aṭas n yiγerbazen d tukkliwin n yimeεdar akk d yimawlan-nsen i d-yussan γer tmeγra-agi akken a d-sen-rren tajmilt. Ula d imḍebren εlayen n lwilaya n Tizi-Wezzu rrzan-d γer tmeγra-agi, ger-assen mass Tiγa, imḍebbar n tamehla iweszla ametti (D.A.S), mass Ould Ali El Hadi, anemhal n yedles n Tizi-Wezzu, mass Ait Si Ahmed aεeggal n wesqamu aγerfan n ugerzu n Tizi-Wezzu (APW), akk d imḍebren n yiγarbazen n yimaεdar yemgaraden, ger-assen mass Cherif Moussaoui aεeggal n Wexxam n yemγaren d imeεdar n temnaḍt n Buxalfa d waṭas niḍen.
Tameγra tebda s yiwet n tecqquft n umezgun n werrac imecṭaḥ n uγerbaz n tujya Usegmisen « Centre Medical Pédagogique » n Tizi-Wezzu, s usentel » A Baba yenuba « . Syen massa Kheddoudja, tamγart n 90 n yiseggasen n wexxam n yemγaren d imeεdar n Buxalfa, tewwi-d deqs isefra γef tudert qessiḥen, γef igguren ttidiren n yal ass,γef lḥif…atg, yuγal wawal yezzi γer mass Kader Taharount, yiwen n unaẓur n wexxam n yemγaren d imeεder n Buxalfa, yewwi-d ula d netta deqs isefra s tutlayt n teqbaylit akk d taεrabt, anda i d-yesmar iḥulfan-is. Ahil n tmeγra ikemmel s cnawi, ccḍaḥ, défilés de mode n tullas timeεdar.
Γer tagara imḍebren fkan kra n wallalen n lemεawna i yimeεdar i yenxeṣen, am ticariḍin, tiεewzin…atg. Tameγra tεedda i teggnatin i yelhan aṭas.
Islam Bessaci