« S wacu i aɣ-ifen leǧnas ? S leqraya d tmusni ! » D wa i d awal aneggaru i d-yeǧǧa Tayeb El Waṭani ass n 29 di yunyu 1992 deg uxxam n yidles n Annaba. Yenna-d diɣen : « Wagi d afus-iw, ẓleɣ-t i yimdanen i merra. » Lameɛna, imdanen-nni yellan ttrajun lxir deg ufus-nni ur idum ara usirem nsen ula kra n tedqiqin, imi leḥǧab yellan deffir n uselway yedreg deg-s leɛǧeb ! Boumaârafi, yiwen seg wid ilaqen ad yesseḥbiber ɣef tudert n Boudiaf, yessureg fell-as aɛbar iwakken ad iqemmeḍ lɛemr-is. Mačči kan d aselway i yenɣa, maca d asirem.
Ilemẓi yesɛan ass-a 20 n yiseggasen ahat ur yessin ara aniwa i d Tayeb El Waṭani. Ahat yezgel yiwen n uḥric s wazal-is deg umezruy n tmurt. Acku, win akk i iwalan Boudiaf ass n 16 deg yennayer 1992, mi akken i d-yers deg unafag n Lezzayer yeḥsa ass-a anda tuḍen icci-s. D asirem s lekmal-is i d-ihubben ɣef tmurt yersen ɣef yiri n usayax. Tirmit-is d nniyya-s ɣer lebni n tmurt yesǧuǧǧeg tafsut deg lyali. Widen yecfan d wid yettmeyyizen ẓran lqima n urgaz-a deg tejmaɛt n 22. Ẓran daɣ talalit n l’FLN d ulɣu n umenzu n wunbir 1954. Yessens timest n 1949 iwakken ad yecɛel tin 54. Yessaweḍ ɣer lebɣi-s, imi yessedda tagrawla almi d tifrat-is. Maca, qelbent tirga, widen akken yellan di tmeqyast zzin-asen aɛrur wid yerwan amerreḥ di tewiɛt n ddiq. Wid iqublen rrṣaṣ d leḥbus n Bigeard taggara nsen di leḥbus akked neffu. Amek ihi, Hocine Ait Ahmed, Boudiaf, Krim d wiyaḍ uɣalen di rrif mi akken Ben Bella d Boumediène ɛeǧren ɣef ukersi !
Win ikesben nnif, d awezɣi ad as-brun i tebɣu qessiḥet tegnit. Iwakken ad yerr talast i yimesḥaf, yerra-d i teɣri n tmurt, tin akken iɣef isebbel temẓi-s. 6 n wagguren urɛad zemmen, tezzi-d fell-as tlafsa.
Mi akken yuzzar yisalli, usan-d akk ɣer-s leḥbab-is. Yal wa amek i iḥulfa i tyita. Maca, tella ziɣ tyita yekkan deg tayeḍ. Amek ihi, yiwen seg wudmawen yettwasnen deg unnar n yimenɣi mgal aṛumi, mgal adabu amesbaṭli yeɣli-d fell-as udrar mi iḍal ɣef wudem n Boudiaf. Wagi d Slimane Amirat ad fell-as yeɛfu yerḥem, i yernan s aselway yettwaɣeḍren. Yeḥbes wul-is, akken yeḥbes usirem n yizzayriyen.
Ass-a, amekti nneɣ d tarwiḥt n sin yirgazen-agi yuklalen tajmilt almend n wazal nsen. Ayen nebɣu nenna-t-id, neɣ nura-t-id, ur nessawaḍ ad d-nebder ayen akk i xedmen ɣef tmurt-a.
Maca, ayen kan i nezmer ad t-nessiweḍ d izen i sin n yimeɣrasen-a d akken ad ṭṭsen di talwit imi skeud mazal tarwa n leḥlal abrid i d-nejren ur yergil ara.
Sylia. M