Idles, taẓuri d tinḍi(artisanat) n tmurt n leqbayel sεan azal d ameqran deg tmetti. D aya i d lwert ur nfennu i tḥerrez tsuta i tayeḍ. Deg tɣiwant n At Yanni ad d-tili tmaɣra n lfeṭṭa d yisuɣan. seg 14 ar 22 yulyu. Tagi d tazrigt tis tesεa i deg ara ttekkin azal n xemsin n yiḥeddaden d yinḍen niḍen. Ad d-rzun seg tizi wezzu d lwilayat nniḍen am: Adrar, tamenɣast, timimun, taɣerdayt, atg. Tameɣra-agi d tagnit i wakken ad d-mmyagaren idelsan d inaẓuren yemxallafen. Akka ara ččaren inerzaf allen nsen, ad ẓren ugar ɣef wayen yettwaxdamen deg tmura nniḍen. D tagnit i tmeẓriwt n tẓerbit n tɣerdayt, aẓaref d yisuɣan n yimucaɣ, rnu ɣer waya tiẓuriwin niḍen am taklut, nnqec ɣef nḥas, adlag, talaɣt, atg.Tameɣra-agi ad d-tili deg uɣerbaz alemmas, deg wexxam n yilmeẓyen d wexxam n yidles n tɣiwant. Taseqqamutt i d-yelhan s uheggi n tmeɣra ad tbed i lembat d usečči n wid ara d-yasen ad ttekkin di tezrigt tis tesɛa. Ad d-ilint daɣen tmeɣriwin n ccna d isurag n tindi. Rnu ɣer waya urar n ṭunbula, ara ybudden i win ara t-irebḥen takerrust. Tameɣra-ya ad tezgu d yiwet seg tid i iḥerzzen amezruy d yidles amaziɣ sumata, aqbayli labaεda.
Labawi Yasmin.