Imi Remḍan yewweḍ-d s amnar n tewwurt, s kra n win yessawḍen ad iɛemmer axxam, yettfaras yulyu bac ad yezweǧ. Ɣef waya dɣa i yendeh wurar ussan-a, ugar n yiseggasen iɛeddan. Anda teddiḍ di tuddar d tɣiwanin n Tmurt n leqbayel d… “les cortèges”. Yella wanda tijmuyaɛ n tuddar sersen-d kra n yisuḍaf ara yerren talast i kra n leɛwayed i icuden ɣer tmeɣra, am dɣa, tiqufya s waṭas n ṭunubilat. Aṭas ahat ur iɛeǧǧeb ara lḥal, imi ttwalin di talast-agi d anesqes deg tlelli n umdan. D acu, akken i d as-teqqar Ṭawes* ẓrant tejmuyaɛ anida ara teqqers.
Acḥal n tikkal i nesla s tawaɣiyin i yeḍran deg les cortèges n tmeɣriwin. Acḥal n tikkal i neḥḍer i lferḥ yuɣal d lqerḥ.
Ddurt-agi kan i i ɛeddan i teḍra twaɣit di tɣiwant n yimceddalen : tayemmat d mmi-s d teqribt-nnsen wwḍen leɛfu n Rebbi deg ubrid aɣelnaw wis 26. Di dqiqa yeɣli-d ṭlam ɣef Yimceddalen. Skra n win yeslan s tawaɣit-a yesbabb-itt i tufɣa n leɛqel n yinehharen. Ad ner lwelha belli ɣas ma leɛqel yeffeɣ inehharen, ula d ibarajen n yiǧadarmiyen d wid n yibulisiyin fkan afus, imi akken kan ara d-iɛeddi cortège ad as-ldin abrid mebla ma rran-t s abrid.
Salas.O.A
*Ṭawes yessefraḥ-tt wergaz-is, yal aseggas, s tqendurt tajdidt. Uqbel ad tt-tels, tettxiḍ-as tifawtin di tgucrar. Di taddart, tilawin wehment di tfawtin tettara Ṭawes i tqendyar tijdidin. Ass-nni, ruḥent ɣur-s s axxam nnant-as : “Amek a Ṭawes, yal tikkelt ara kem-yesefreḥ wergaz-im s tqendurt tajdidt, tattaraḍ-as tifawtin ?”
Terra-asent : “zriɣ anda ara teqqers !”