D taneɣlaft n tmerrit d tinḍi akked ugraw aɣerfan n lwilaya n Tizi-Wezzu d usqamu n tfaskiwin n tɣiwant n At Yanni i d-yellan di lmendad i tmeɣra n lfeṭṭa n useggas-agi. D tazrigt tis-tesɛa ara yeḍrun seg 14 ar 22 yunyu. D agensas n unemhal n tmerrit n lwilaya n Tizi-Wezzu d lmir n At Yanni mass Bumazza i yessunẓen tameɣra n useggas-agi. S yin imḍebren-agi d igensasen n Dayra zzin-d i temzikniyin n lfeṭṭa d tẓuriyin nniḍen i d-ittwaheggan deg uɣerbaz alemmas Lerbi At mer, d uxxam n yidles n tɣiwant Mulud At Mammer. Mi d-yeɣra mass Buɣareb aḍris ɣef tfaska-agi yefka awal i lmir d unemhal n tmerrit. Deg sin nnan belli tifaskiwin-agi n lfeṭṭa ilaq ad dument, acku At Yanni ma texḍa-yas lfeṭṭa mačči d At Yanni. Tameɣra n useggas-agi tewwi-d amaynut, imi tessaweḍ ad tekkin deg-s 41 n yiḥeddaden seg Wat Yanni kan, mebla wid i d-yusan seg tmura nniḍen am : Ǧelfa, Wergla, Sṭif, in Timucent, Taɣerdayt, Tamenɣast d Adrar. Lwilayat-agi, glant-d s timzikniyin yecban asaku n Tɣerdayt, isɣunen n Yimucaɣ, adlag, taklut, talaɣt, nqec n wesɣar, tikesiwin d iselsa n tmurt n yiqbayliyen d wid n yimucaɣ. Timzikniyin-agi ad ilint yal ass, rnu ɣer-sent isaragen d uskasi ɣef tẓuri d tinḍi. Deg taggara n tmeɣra ad d-banen anwi ara irebḥen urar-nni n ṭunbula, wigi tettraǧu-ten tkerrust, la Moto neɣ tiliẓri. Ɣas akka At Yanni ṭṭfen deg tẓuri nsen seg lqern wis 14, maca di tizi n wass-a aṭas n yiewwiqen i d-ttmagaren. Acku isufar imenza ɣlay-it nezzeh, am lfeṭṭa ur nettwaxdem ara tewweḍ ar 14,5 n yimelyan i kilu, rnu ɣer-s tabzert yulin d lixṣaṣ n tmerrit. Ass-a iwakken ad d-yuɣal wazal i yisɣunen n At Yanni, ssehlen-asen-d tisin i yimerriyen, imi ttwaheggan-d sin n yixxamen n usnubget: Azebriz (auberge bracelet d’argent) d uzebriz n yilmeẓyen i izemren ad yessens settin n yimdanen. Tameɣra n At Yanni ad d-tezg i lebɣi n yal inebgi neɣ amerray, akcu tesdukel-d ugar n tẓuriyin, yerna ad d-ilint snat n tmeɣriwin i d-yettawheggan s lemawna n uxxam n yidles n Tizi-Wezzu.
Labawi Yasmine