Taddart Nat Hicem, i d-yezgan γef 3 n yikilumetren γef tγiwant n Σin El Ḥemmam, suddsen-d i tikkelt nniḍen Tafaska tadelsant n uẓeṭṭa Nat Hicem. Tikkelt-a, d tajmilt i yuγalen i 3 n wudmawen mucaεen deg uḥric-agi n uẓeṭṭa Nat Hicem i yettwasnen deg temnaḍt-agi. ihi, tameɣra-agi d tagnit n usmekti n kra n tulawin- n taddart-agi i tewwi yakan tmettant, ruḥent, maca ǧǧan-d agerruj. Tigi d Aït Bellil Nouara, Aït Ouazzou Nora akked Aït Ouazzou Nouara.
Tazrigt tis snat n tfaska-agi tsudes-itt-id tdukla tadelsant Tiliwa n temnaḍt Nat Hicem, s tallelt n Lwali n Tizi-Wezzu akked Tneγlaft n yidles s teγzi n 5 n wussan ara yebdun seg 21 alamma d 25 yulyu, anda i d-swejden yiwen n wahil d amerkanti. Tafaska teldi tiwwura-s s wudem unṣib tasebḥit n wass n 21 yulyu deg uγerbaz amezwaru n taddart, anda i llan imḍebren n temnaḍt-agi d wid n twilayt n Tizi-Wezzu.
Syen, tella-d lweεda n taddart. Tameddit n wass d yiwet n tmeγra meqqren, anda yecna yiwen n unaẓur yettwasnen Rabah Asma. Am wakken i tettekki tarbeεt n ccna « chorale » n temnaḍt-agi s kra n tezlatin yelhan syen yella-d umezgun n yiwet n tarbeεt n taddart Nat Hicem.
syen llan-t-d tceqqufin n umezgun n unecraḥ d usenεet n usaru briruc « Vriroch ». Ahil d win γezzifen, aṭas n yinaẓuren i yellan gar-asen Brahim Tayeb, Tarbeεt Tagrawla d tcennayt Hassiba Amrouche i yellan γef ddemma n tfaska-agi.
Kamal Abdat d unaẓur yukka s umunulug-is. Ɣer tama n waya, ad yili ula ccḍaḥ n yimucaɣ. Imḍebbren n tiddukkla heggan-d diɣ asenɛet n yiwen n usaru amazray n Ahmed Oulkadi.
Taggara n tfaska ara d-yilin ass n 25 yulyu, ad ttunefken deg-s 3 n warazen i yiẓeḍwan i d-yufraren d imenza deg yiwet n tmeɣra ideg ara yili ucennay Ali Amrane.
Islam Bessaci