Iɣalen n usellek neɣ la protection civile d wid i d- iheggan ttawilat meqren ilmend n yibeddi mgal times. 32 n tudrin iɣef ara d-tili lemḥadra, imi zgant-d deg yimukan anda i teqreb teẓgi. Ilmend n waya ihi, azal n 364 n yimdanen yettuferqen ɣef 6 n trebbuyaɛ ara yilin di lmendad i yimezdaɣ n tudrin.
Ad d-nesmekti d akken ulamma yella-d uheggi yecban wa, ara yeǧǧen imdanen ad idiren mebla tugdi, iwulem ad d-nini ttawilat d wid ixuṣṣen, imi tamurt n leqbayel d tin iɛemren s tɣaltin d yiɣezran. Ur tettishil ara taluft i yiɣallen n usellek ad ssiwḍen ad ssexsin times ma ur llint ara kra n tmesrafgin. D acu kan aḥric amezwaru n uḥareb d win yerzan aseɛlem n yimdanen, imi tuget n teswiɛin nettaf belli d amdan I d ssebban n twaɣit i iḍerrun.
D.I