Mohand Oulhadj, isem-is aḥeqqani Akli Muqran, ilul di Bouzeguène ass n 7 di meɣres 1911. Aɛdaw arumi yeṭṭfen yakan tamurt yeqqar-as” Abareɣ awessur” ilmend n tiḥerci yekseb, imi ur yessaweḍ ara ad t-id- yeṭṭef deg ucebbak-is. Ma d irfiqen-is n umennuɣ, ssawalen-as “Amɣar” ilmend n ṣṣwab d uwelleh-is s ayen yelhan.
Mi yekfa leqraya-s deg useggas 1926, yexdem deg tḥanut n baba-s yellan d aḥeddad. Imi deg lawan-nni laẓ yewweḍ-d s imnaren, yunag am netta am tezyiwin-is ɣer tmurt n fransa. Dinna, ur n-yeqqim ara aṭas, imi leḥmala n tmurt d yimawlan-is ur t-ǧǧin ara ad yinig. Yuɣal-d ɣer Lezzayer iwakken ad iruḥ ad yexdem di Sṭif netta d sin seg warraw n leɛmum-is.
Imi ineggura-agi ttwaḥebsen di tnekra n 8 maggu 1945, yebded ɣer tama nsen di creɛ iwakken ad ten-id-yessukkes seg yifassen n uɛdaw i asen-yesbabben tilufa timeqranin. Di 1948, yettusbed d aqerru n tejmaɛit n Akfadou. Leqdic-is di tmetti tessaweḍ-it almi yeffel akkin i taddart neɣ ahat lɛerc-is, imi d win yebdan itessu i tegrawla tameqrant.
Deg useggas n 1955, yeffeɣ s adrar, yegla s tlata n warraw-is, yerna kra n wayen yekseb n cci yefka-t i tegrawla. Awdaw, si reffu, yesserɣ-as axxam, yerna yesseḥbes iɛeggalen n twacult i d-yeqqimen. Deg udrar yakan, i yessaweḍ ad yessali aswir-is iwakken yili d amḍebber, imi s kra n widak yellan yid-s gan deg-s laman. Mi yuɣal d le commandant, yexdem ɣer tama n Amirouche, d amɛiwen-is di tsertit. yettwajreḥ deg useggas n 1958 s yiwet n txazabit i texdem fransa s yiwet n rradyu. Asmi yeḥla, yeǧǧa-t Amirouche deg umkan-is deg useggas n 1959, mi yekker ad iruḥ ɣer Tunes. Dɣa, d amkan i yeṭṭef segmi yemmut Amirouche, d aqerru ɣer lwilaya tis-3.
Mohand Oulhadj yemmut ass n 2 seg dujember 1972, di lɛemr-is 72 n yiseggasen. yemḍel, anda i imenna, di taddart-is Bouzeguène ɣer yidis n yimawlan-is.
Aɣmis.