Yal mi ara d-yass remḍan, aḥric ameqran n yizzayriyen ttneqlabent leɛwayed nsen, tettbeddil tmuɣli nsen deg waṭas n temsal alamma tikwal ur tettamneḍ ara acu i izedɣen allaɣen nsen.
Lukan kan ad d-nebder tawatra, ad naf tuget n yimdanen d wid yettarran afus ɣer lǧib iwakken ad ɛiwnen wid ixuṣṣen. S tidet, ṛṛeḥma tezdeɣ ulawen n yizzayriyen. D acu kan, ass n umezwaru n remḍan, deg yiwet n twilayt n uneẓruf n tmurt, imḍebren ufan d akken azal n yimeɣban n useggas-a yennerna s sin n yeḥricen ɣef useggas yezrin. Asmi yendeh unadi ɣef yismawen, ufan d akken llan wid yesɛan ssuturen “tin n Rebbi», bɣan akken ad ččen seg lmektub n yimeɣban !
Deg tama nniḍen n tmurt, ladɣa deg umalu, imdanen yeqqaren nekni seg wid iṣebbren I lḥif zzin ɣer yidis nniḍen. Ass n umenzu n remḍan, tawilayt n Wehran tedder taswiɛt tamxalleft, imi wid yessewwayen aɣrum ur ṣṣawḍen ara ad leḥqen ayen I d-ssuturen yimdanen. Yekker wah ruḥu deg tḥuna. Amzun akken ssexzanen, ugaden ad d-yedfu laẓ !
Wiyaḍ, ilmeẓyen beddemma, fursen tagnit n remḍan iwakken ad tɛeddin ɣef yimdanen. Ɣef leḥsab n yisallen i d-yewḍen, nnig n 200 n yimdanen, gar yirgazen d tlawin iɣef d-tella tekriḍt di sin wussan imenza n waggur-a. sin n yimdanen I yessufɣen tarwiḥt deg wass wis-sin n remḍan di temdint-a, ma d imejraḥ ur yelli leḥsab imi nnig n 130 n yimenɣiyen I d-yeḍran.
Iɣallen n usellek rran-d tikkelt-a rrabul nsen ɣef wayen yerzan tiwaɣiwin n yiberdan. Deg wass amenzu n remḍan, azal n 20 n yimdanen i yemmuten deg twiɣa-agi. Tuget n laksidat yeḍran llant-d gar lxemsa n ssebɛa n tmeddit.
Ma d asqejjem akka deg ubrid, deg leswaq, winna ur yelli deg-s leḥsab. Seg walluy ɣer uɣelluy, ur ttarran yimdanen iles gar tuɣmas.
Ma d lxedma, am wakken i nwulef, aḍar ɣer zdat, sin ɣer deffir. Ayen I tessutreḍ ad ak-inin ar iɛeddi remḍan uɣal-d. Qqaren-d belli deg waggur-a, tiwwura n lǧennet brarḥent, tid n tmes medlent. Hemmmm, cukkeɣ akken nniḍen
Ziɣ yewɛer laẓ ay at… !
Sylia. M