Nuja ideflawen(Schneewittchen/Blache-Neige) d yiwet ger tmucuha n watmaten Grimm d-yesmuḥyet Sεid At Mεemmer si tlalmanit. Ukkuẓ(4) gar-asent tmucuha-yagi, asefru yakkd tezlit i warrac, la ten-tkelles tnaẓurt Tatie Tamcumt, a d-yeffeγ usidi-nsen(t) di taggara unebdu-yagi n 2011.
… »Ih ad qqimeγ ma yehwa-yawen, s lferḥ d ameqqran », id asen tenna Nuja ideflawen, dγa teqqim γur-sen.
Mi yuli wass, ulin s adrar, anida ssekfalen nnḥas, lfeṭṭa d wure&gamma,; mi d-tewweḍ tmeddit, ufan-d liḥala teddez tebrez, yal taγawsa teṭṭef amḍiq-is,axxam akk zeddig, imesi yeḥman yettrağu-ten.
Segmi s kra yekka wass, yili nettat iman-is kan i teqqim deg wexxam, cummen-tt yeḥninen-nni n iymuyuden, ufant-tt taswin-nsen, ihi εeggnen-as i teqcict, nnan-as:
« Tamcumt-nni n tmeṭṭut n baba-m, annect tebγiḍ tekkeḍ-t, ad tuγal ad tẓer tagi i telliḍ. Ihi aγ-aγ awal, ma d taεzizt n yemma-m ara d-yuγalen, ur d as-d-teldi ara tawwurt, ur ttamen yiwen, ḥader! »
Dγa tagellidt-nni iwumi teqqur tasa, seg wakken tγil tessebleε tasa n Nuja ideflawen, daγen d nettat i yifen akk tilawin di ccbaḥa, tbedd-as i lemri-s zadt-s, testeqsa-t:
“Ini-d, ini-d a lemri
Deg idurar, illel neγ di tniri
Di tγerγert neγ deg igenni
Tella tmeṭṭut, aggur neγ itri
I d iyi-yugaren di ccbaḥa?”
Yerra-yas-d lemri:
„A tagellidt n tidet d wulawen
Ulac akk am tidet yemmden
Mazal tif-ikem aṭas aṭas Nuja ideflawen
Izedγen seg idurar akin γer sa Iymuyuden”
Tameṭṭut tečča times, yyah tenna-yas, ihi ikellex fell-i ula d aṣeggad afuḥan tura? Ttezzi ttenneḍ, d acu n ttawil ara d-taf, akken ad as-tessufeγ rruḥ i Nuja ideflawen, acku teẓra d tidet i d as-d-yessawel lemri, tedder Nuja.
Ur d as-tezmir ara i tudert ideg ara tẓer tella tayeḍ i tt-yifen di ccbaḥa, neqqent-tt tismin, yettnekkar ujajiḥ n tmess di ṣṣura-s, dγa ur tettaf ara yakk talwit.
Mačči aṭas i tezzi tenneḍ, teqlaleḥ acemma akka d wakka, dγa tufa-d tikti swayes ad as-tendi ticerket i Nuja ideflawen
yettkemmil…