Akken kan ara sbelɛen yimdanen tilqimt taneggarut si lfaḍur, ad rren lwelha nsen ɣer tiliẓri iwakken ad ẓren axxam-nni n Dda Meẓyan. Am leɛwayed-is, s učamar d tɛekkazt i iberren deg ufus am umnay, Dda Meẓyan yeɛreḍ ad d-yessebgen, ɣas akken ulamma s teḍsa d ucmumeḥ, iɣeblan n yizzayriyen. Yesnunnec di tazwara di zwaǧ akked temɣarin tirumiyin, akken yexdem mmi-s Akli, daɣ amek i yessedduy umɣar tilufa n uxxam di tmurt n Leqbayel. Ma nezzi-d akka ɣer wamek yella usaru ad naf d akken tililit n Hamid Achouri, iwumi isemma “Makhlouf” terna-d acemma n cbaḥa imi d udem n Lezzayer i d-yellan, snat n tmeslayen, ɣas ma mgaradent, maca ttemsefhamen yimdanen. Lameɛna, ilaq kan ad d-nebder ayen ur neɛǧib ara tuget n yiqbayliyen. Lqahwa n Dda Meẓyan tura ḥala s yiwet n tutlayt, amzun akken ur yezmir ara ad yaru tamaziɣt. Rnu, daxel-is, ur nwala ara ula d yiwet n tɣawsa icudden akka ɣer teqbaylit. wagi ahat, yezmer ad yili yekka-d seg tatut. Maca, tella tin iɣelben-aya. Deg yiwen n uḥric seg usaru-agi, nesla i kra n yimeslayen ssewhamen. Tagi, mi akken, Said, win ixeddmen di lqahwa yebɣa ad yaɣ Aldjia, yelli-s n Dda Meẓyan. Dɣa yura-as tabrat, yuzen-itt i Kabicu. Mi tewweḍ s afus n Aldjia, tegguma ad tt-id-tɣer, dɣa tefka-tt i Tawes, tameṭṭut n gma-s. Din, i d-iban uxeṣṣar, mi as-tenna:”Ata-n yura-tt-id s teqbaylit, iban ur yeɣri ara!”
Lmeɛna-s, s kra n win yettarun s teqbaylit d “analfabit” !
Tura, ma yella yettwahegga umeslay-a deg usaru ata-n d agejdur. Ma yella yeɣli-d kan akka d aquccu ! Acku, ula d nekni yettarun tura s tutlayt nneɣ tayemmat ad aɣ-ḥesben wiyaḍ d ibhimen, d ayen ara yesǧehden tama n wid i yebɣan ad tt-rẓen. Limer d lebɣi, d asaru n Dda Meẓyan i ttwalin akk medden ara yilin d allal i useqdec n tmaziɣt nnig n waya, mačči d win ara yestehzin s yes. Lḥasun, akken tebɣu tili teswiɛt, ayen bɣun inin-t medden, nekni numen s wayen i nxeddem, imi neẓra d abrid yessufuɣen.
Sylia. M