Akken yessawel Ǧeṛǧar i Luṛis i ten-id-tessemlal tiɣri n Uzwaw di tmurt n wakal d yidammen, tiɣri n tnaṣlit d uẓar igemmen isegmi n leḥlu, di taddart n tẓuri d yidles n Ṛṛadyu n Lezzayer. Timmuzɣa deg wul, aḥrun i ten-yeččan, yečča-ten ɣef uẓar-nsen, ɣef tutlayt-nsen,ɣef yidles-nsen. Snat n tliwa yesswayen fad n lebɣi, fad n uḥemmel, fad n temlilit, fad n yiseɣ.. Uɣent teftilin n yiḍ, rnant tid n wass am tmecraraqt n yiṭij akken kan ara d-yecreq di Askrem neɣ di Ṭasili n Aǧeṛ. Tazeqqa teɛmer s wid iccedhan Ul-inu yečča-t fell-am, yemma lkahina d tezlatin nniḍen i d-tecna terbaɛt Les Berberes, Imaziɣen n Oum el Bouaghi. Tarbaɛt i d-yebdan tikli deg yiseggasen n sebɛin . Di tmanya yid-sen ṛzan asalu i ccna n Rock s tcawit. Ḥafi, acebbub yettawi-t waḍu n tlelli, yuli-d s asayes. Yefreḥ s imaziɣen i d-yusan ad ḥedren i ydurar-nnsen imi msawalen. Lmusiqa d aserwiwec, ṣṣut d lhiba d tissas. Yal tizlit d tanagit umezruy n wawras, d ccfawat d lebɣi n wul. Tazeqqa teɛmer, ters-d tsusmi n yiḍ. Asayes yecbeḥ s teftilin iceɛlen ttnusent, rennunt di ccuq n wid iḥedren di Chapiṭu n Ṛṛadyu n Lezzayer. Zwaren-d ixulaf n lmusiqa n terbaɛt Eclipse. Akin, tuli-d Malika d umendil bu teɣrisin, s tqendurt n leqbayel d lfeṭṭa i s-yernan di sser, d rriḥa n tmurt. Tserreḥ i ucewwiq “ay asru», mazal ṣṣut-is am wasmi meẓẓiyet. Tiɣratin rrant-d ṣṣut di tzeqqa. Ayen din n tlawin i d-yusan ad as-ḥedrent i tuɣalin n tinna yecnan tamengurt, lefraq, leḥmala ujeǧǧig n yefri, tinna yecnan tawenza yuysen imi ur d-tefki ara. Am tcemmaɛt i ireqqen ɣef tirga n temẓi…kra din yellan di tzeqqa yessibnen lewqat n tuɣalin n tmeɣnast irefden s tbuḥcict-ines tira n Muḥend Uyaḥya, tinna yernan sser i tezlatin n Sofyan d Takfarinas. Tazeqqa terɛed mi d-tecna “ay azwaw aqli feṛḥaɣ, imi y-innan wi kem-ilan”. Imeṭṭi yemmar-d, tiɣratin ssawalent am wanza n Lwennas mi i d-tebder isem-is: “ ur ttṛuzuɣ, ur yettizwiɣ wudem-iw, ur zzenzaɣ idammen-iw, isem-iw d Tilelli”. Anza n Lwennas yessawel di Lezzayer am wakken i d-yessawal di tala n Bunan. D tizlit taneggarut, ata yusa-d Djamel SABRI, ikemmel ccna d tcawit s lmusiqa ay azwaw am zun akken uɣen tannumi cennun-tt akken. Joe yettawin Lwennas deg ul… akken di sin am netta am Malika ad as-d-rren ṛṛuḥ, imi ara cnun lḥed i d-iteddun, deg unnar OUKIL Remdane, di Tizi Ouzou. “Ay ajeǧǧig usuki, win yettun a t-id-smektin, ay abeḥri…
Zira