Tiddukla tadelsant n taddart n Saḥel i d-yezgan i temnaḍt n Wizgan, lwilaya n Tizi-Wezzu, tessudes-d ddurt-agi yezrin, tazrigt tamenzut n tmeγra n ukermus s teγzi n ssin n wussan, ass n 19 d 20 γuct 2011. Ayagi yella-d s-ddaw n leεnaya n tesqamut (tejmaεt) n taddart n Saḥel akked yimezdaγ-is. D tikkelt tamenzut i d-tella tmeγra icuban tagi.
Seg wass n 19 γuct 2011 i tebda tmeγra s wudem unṣib deg uγerbaz amezwaru n umeγras Bakouche Mohand Ouamar, anda i d-mlalent twaculin n taddart, seg umγar almi d ilmeẓi. xas akken asewjed-ines yella-d uqbel s waṭas, imezdaγ n taddart n Saḥel, meẓẓi, meqqer, bedden γer yidis n yimḍebren n tiddukla nsen, fkan-asen afus n tallelt, heggan akk ayen iwulmen i usmures n tfaska-yagi. Ahil i d-yettwaheggan ilmend n tmeɣra-agi d amerkanti. Ggten-t temzikniyin, tin icudden ukermus s waṭas n leṣnaf, isufar n wučči am Tmeqfult, Aγrum, Tamtunt, Ifelfel n zzit, Tamment&hellip,; tikksiwin n leqbayel, iẓeḍwan, taklut, neγ ayen yerzan tafellaḥt. Deg wass wis ssin, ass n 20 γuct, d taggara n tfaska i d-ye llan s yiwet n tmeγra yelhan s tukciwin n warrazen n usebγes i wid yettekkin.
Islam Bessaci