Accueil Tamazight Aṭas n leqdicat i d-yellan i lmend n waya

AT RZIN - Aseḥbiber ɣef twennaḍt

Aṭas n leqdicat i d-yellan i lmend n waya

465

Awrir, d yiwet n taddart i yettabaεen ɣer tɣiwant n At Ṛzin. win yerzan ɣur-s, ad iger tamawt i tddukkli i yellan gar yimezdaɣ-is. Ama d irgazen, ama d ttilawin. Ayagi, yettban-d deg yinejmuεen i xeddmen gar-asen, ladɣa deg teswiεin n ṭṭiq. Deg-sen dɣa, ttemcawaṛen gar-asen, ttembaddalen tiktiwin, armi i d-ffɣen s tifrat i ilaqen. D aya i aɣ-d-tenna Nna Ṭawes deg tnaga-s, ɣef umcubbek d umεiwen i yellan gar dderya n taddart-nsen.

Rnu i waya, ula d ilemẓiyen n temnaḍt-a, ḍefṛen abrid n yimezwura-nsen. D ayen i ten-yeǧǧan snulfan-d agraw n yilemẓiyen, i wakken ad as-fken i wawal azal-is, s umbaddel n tektiwin. Ad d-nesmekti d akken, agraw-a yennulfa-d ddeqs n yiseggasen-aya. Ma yella ɣef leqdic n yiεeggalen-is, ineggura-a, εerrḍen yal tikkelt ad d-rnun abaɣur i taddart-nsen, d yimezdaɣ-is. Aredmani, fkan azal ama i yidles, s yisaragen iskasiyen i xeddmen deg tzeqqa n unejmuε-nsen, yal ass n sem. Am akken i ttilint temliliyin-a, d tagnit i wakken ad sqerdcen timsal gar yimezdaɣ d yiεeggalen n ugraw n yilemẓiyen. Seg tama-nniḍen, εeṛḍen ad d-afen tifrat ula i kra n yiɣeblan i sεan At taddart. Am uεiwen n yiẓawaliyen d yimuḍan.

Mebla ma nettu daɣen, ula d tezdeg n taddart, fkan-as amur deg wahil-nsen. Niqal ssutren-as i uselway n tɣiwant-nsen ibidunen n ugudu, lameεna yerra-asen-d belli ur ten-yeksib ara deg teswiεt-a. Nutni seg tama-nsen, ur bran ara i usirem. Daymi i nnejmaεen ass n, 17 di duǧembeṛ yezrin, i wakken ad frun tamsalt-a. Γer taggara, ffɣen-d s ṛṛay belli d nutni ara ten-id-yaɣen. Γef waya i gren tiɣri i yimezdaɣ i wakken ad ten-id-εiwnen, yal yiwen s wacu yezmer. Γer taggara, ad nesnemmer iεeggalen n ugraw n yilemẓiyen n taddart Awrir ɣef leqdic-nsen igerrzen, imi smektan-d s wazal i tesεa tejmeεt deg tmurt n Yiqbayliyen. D nnuba tameqqṛant i turar deg usuddes n tudert deg tuddar. Dɣa nessaram-asen afud igerrzen.

K. K.