Uli Rohde, d yiwet n Telmanit i iḥemmlen idles amaziɣ s umata. Tettlusa iselsa n leqbayel, yerna tcennu s teqbaylit. Nesseqsa-tt amek i twala izerfan n tmeṭṭut deg umaḍal s umata, ha-t-an wacu i d-tenna. ‘’Nebɛed aṭas ɣef umtawi dagi ɣur-neɣ deg Lalmany. Wammag deg umaḍal amaziɣ anef kan ! Llan aṭas n yirgazen i yekkaten ɣef yizerfan n tmeṭṭut deg ddunit, acu kan aṭas diɣ n tlawin, ladɣa, tiyemmatin i d-yettrebbin arrac deg ccuq, u ttarrant tiḥdayin d tixeddamin n twacult. Zriɣ d acu i d-qqareɣ, imi ula d imawlan-iw, ur ssawḍen ara i wakken ad aɣ-ffken izerfan yemtawan, xas nutni d atraren u xas deg tmurt n Lalmany i nella. Acḥal n maḥyaf i tesɛedda yemma s lǧiha n temɣart-is.
Ass-a, la ttwaliɣ wid-nni i d-yekkren deg ccuq, ur zmiren ara i yiman-nsen ; ur sɛin ara timunent-nsen. Aṭas deg-sen ur ssinen ara ad sewwen, ad ssirden iselsa-nsen neɣ ɛad ad izmiren i uxxam-nsen. Ttxellisen s urdi ameqqran i wakken ad ččen lmakla n berra n temɣawlit, ur nzeddig, ur nesɛi lbenna. Aṭas deg-sen i yessḥassfen ɣef ttrebga-agi, xas akken ẓran d ayen yelhan i asen-tebɣa tyemmat-sen deg uxemmem-is. Lameɛna, tidet kan, aɛdaw ameqqran n tmeṭṭut, d tameṭṭut s timmad-is.
Meḥsub nxus yir tamuɣli n yirgazen alamma nerna-d aqejjem d usemẓi n wazal n tmeṭṭut sɣur tameṭṭut. Zaɛma, nebɣa ad nili d tilelliyin, meɛna nekkat deg-sent imi llant d tilelliyin. Aya, dagi ɣur-neɣ, wammag ɣer Leqbayel neɣ ɣer Yimaziɣen s umata, la ttwaliɣ kter, ssarameɣ kan ad idiren akken iwata tilisa i asen-gan kra n wansayen n tmetti deg tudert-nsen. Yerna awal Amaziɣ, d argaz ilelli. Acu kan ur yettili ara d ilelli mebla tameṭṭut tilellit akked tutlayt-is’’.
Hocine Moula