Aggaḍ γer yiswi, mačči d awal kan, s wawal weḥd-s. Yiwen, ur ixeddem ayen i as-yellan di lbal.
Qarren yiwen n zzman, awal s wazal-is, dduklen iγerdayen di tseqqamut i wakken ad rren talast i umcic i d-iγeḍlen fell-assen lḥif. Yenṭeq umeqqran deg-sen: “Ay iγerdayen, ass-a snejmaεγ-ken-id akken ad d-naf tikti i lbaṭel-agi i la ideṛṛun fell-aγ yal ass si lbaṭel n umcic”.
Qimmen yal yiwen la d-yettak-d tikti-s, maca ta tzad ta tenqes. Iγli-d yiwen s tikti d lεali-tt, yenna-asen: “Ay ayetma, ad d-nejmeε idrimen, ad naγet naqqus, ad as-t-nεelleq di temgert-is. Ad nuγal kul ma ara as-nsel i nnaqus, ad neḥṣu yis-s wa ad nerwel”.
Feṛḥen yakk yiγerdayen s tikti-nni acku telha. Maca, tuγal gar-asen yal yiwen yeqqar-as ur sεiγ ara adrim, wayeḍ yeqqar-as nekk ur xeddmeγ ara, amek ara d-fkeγ aḥric-iw seg wazal n nnaqus. Ihi, yekker wawal, tikti telha, nnaqus γlay. Yenṭeq yiwen n uγerda, d netta akk i d igellil: “Ay ayetma, naqqus yeshel, d nekk ara t-id-yaγen, maca aγbel d anwa ad as-t-iεelqen. Dγa yeγli-d wugur n tidet, yal yiwen yebra i wallen-is.
Yahia Yanes