Yettuneḥsab umahal n tilifun aziraz Djezzy gar yimeqqranen i yesɛan ugar n yimsaɣen di tmurt n Lezzayer, ideg i d-yennulfa mettwal aseggas n 2001. Akken ad yesnemmer imsaɣen-is ɣef tekdit-nsen, ad d-yejbed daɣen wiyaḍ, yesnulfa-d ahil n Imtiyaz deg useggas n 2008. Amenzay n wahil-a, yal mi ara yessečč umsaɣ asmad-is (crédit), ad d-yerbeḥ kra n yiɛeqqayen i umiḍan-is. Syin, mi ara yegmer ddeqs, d iɛeqqayen-a i yezmer ad d-yessuqel d arrazen yemgaraden, d ifekkanen neɣ uhu.
Amedya n temrac i umeslay, ijigaten i internet, tisura USB, tilifunat, atg. D acu kan, walan yimsaɣen d akken aṭas i ibeddel Djezzy deg wahil-a, iseggasen-a ineggura, armi ɣas ini yekkes akk arrazen-nni, imi akken ad yesɛu umsaɣ tagnit ad d-yawi yiwen, laqen ahat mraw n yiseggasen n uɛemmer d tekdit. D ayen i yeǧǧan ddeqs n wid ikesben Djezzy d iseggasen-aya, rfan ɣef teɣtest-a n wid yellan ɣef uqerruy n tkebbanit-a n tilifun aziraz. « Akken i d-yerra Djezzy ahil-a n
Imtiyaz, lemmer i t-yekkes axir.
Beɛden maḍi warrazen ula ɣef wid yesɛan tadrimt zgan ttɛemmiren tikarḍiwin, aniɛad ɣef ukelyan amagnu i yesseqdacen kan tilifun akken i as-d-tefka tegnit », i d-yenna yiwen n umsaɣ d ilemẓi. Yiwet n tɣermant tefka-d daɣen tamuɣli-s ɣef usentel-a: « Mačči d ayen igerrzen sɣur Djezzy mi yessali lqima n warrazen. Ula d internet laqen-ak igiman n yiɛeqqayen. Aya d turart yis-neɣ kan », i d-tenna. Ma yella nuɣal-d ɣer tmentilt i izemren ad tili deffir tigawt-a i iga Djezzy, ɣef wawal n ddeqs n yimdanen, d mi tettidir tkebbanit tazɣint n tedrimt. Dɣa, iwala ur yezmir ara ad yettak arrazen am zik, armi uggten yimsaɣen i as-iruḥen.
M. K.