Di tɣiwant n Ayt Smaɛel, i d-yezgan s wazal n 65 n yikilumitren ɣer Usamar-anẓul n waɣir n Bgayet, gten wuguren i icudden ɣer tnezduɣt n yilemẓiyen. Ma mačči ulac akal anda ara yebnu yiwen, ad yili ulac ttawil d tedrimt s wayes ara yesbedd axxam-is. Ad nekkes kan wid yesɛan tadrimt, wamma yerza waya afmiḍi ameqqran n yilemẓiyen n Ayt Smaɛel. Ɣef waya i tteklen ɣef lemɛawna n uwanek s wayen iwumi ssawalen « Ixxamen n lḥukuma ». S yiwet n tmuɣli, ugur n tuqin n wakal iban-d acku idrumen akk, ttwabnan armi ula d tiẓgi yexlan zik, ibeddu ileffu-tt umdan akken ad yezdeɣ. Ma yella d win n tallelt i d-yettak uwanek, icudd ɣer uɛeddi d uɛeṭṭel n tsutert. Llan kra n yilemẓiyen, zrin semmus n yiseggasen segmi sutren, maca ar ass-a urɛad i asen-d-yeffiɣ uxxam. «Aṭas-aya segmi sutreɣ amur-iw n tnezduɣt ula d nekk di tɣiwant-nneɣ. Maca uyseɣ ttraǧuɣ, ulac ad d-yas yisalli yessnecrahen. Yal tikkelt ara steqsiɣ, ad i yi-d-inin urɛad », i aɣ-d-yenna yiwen n yilemẓi i igan tasutert n tnezduɣt. Yewwi-d ad d-nini belli d ameqqran uɣilif-a armi yeffeɣ i tezmert n yimḍebbren n tɣiwant n Ayt Smaɛel, ɣef wakken i d-tewwi teɣbalut-nneɣ i iqerben i Useqqamu aɣerfan aɣiwan. Aya, acku gar umḍan n yixammen i d-yettunefkayen yal aseggas akked win n yikaramen n tsutriwin i yellan deg uxxam n tɣiwant, yella umgarad d ageɛmir. D ayen i yeǧǧan wid yellan ɣef uqerru n tɣiwant-a tamsedrart, suturen deg wid i terza taluft ad smeɣren amur i d-yettunefkayen i tɣiwant n Ayt Smaɛel, meskud tezga-d deg udrar, ihi ulac deg-s ar tura isenfan n tnezduɣin-nniḍen am deg temdint.
M. K.