Accueil Tamazight «Aṭas n texxubta i d-ufiɣ…»

Cherif Mellal deg umaṭṭaf wis sin : «Aṭas n texxubta i d-ufiɣ…»

42
- PUBLICITÉ -

Mbeɛd igemmaḍ ur ngerrez n terbaɛt n Yilemẓiyen n Leqbayel (JSK), imi deg 10 n temliliyin texser 4, yeffeɣ-d ɣer tɣamsa uselway, Mass Crif Mellal, akken ad d-yessefhem kra n yiɛeqqayen i yimḥemmalen n terbaɛt ladɣa. Dɣa, ama deg BRTV neɣ deg umaṭṭaf wis sin, yerra-d ɣef ddeqs n yisteqsiyen, ad neɛreḍ ad d-nawi da agejdan.

- PUBLICITÉ -

Taluft n Ɛibud

Aṭas-aya ur d-iban umurar aqbur n terbaɛt taqbaylit, Mass Mulud Ɛibud. Yenna-d Mellal yessawal-as, yettaf tilifun-is yemdel. Ssebba n waya, ɣef wakken i d-yenna, d ayen iwala urɛad yettwaseggem di terbaɛt. Yenna-d Mellal aql-it yessizdig kra-kra, acku aṭas n texxubta (hypocrisie) i d-yufa deg umaḍal n ddabex n uḍar.

Tuṭṭfa n usleɣmay Velud

Akken neẓra, niqal yeffeɣ-d wawal d akken temsebḍa tenmehla n JSK d usleɣmay Velud. Maca yeskaddeb Mass Mellal aya, yenna-d ɣas ma rfan seg ugemmuḍ am winna ( akked Belɛebbas), ur d-yelli gar-asen wawal ɣef ugzam n wassaɣ.

Isenfaren n yimal

Yebder-d Mellal isenfaren i d-itteddun n terbaɛt taqbaylit. Ama d anammas n usileɣ, iɣef tella Cevital di lmendad, neɣ d axxam n tnezzut n terbaɛt. Yenna-d aql-iten ttazzalen akken ur ttɛeṭṭilen deg tlalit di sin.

Taluft n gma-s Ɣilas

Ifures Crif Mellal tagnit akken ad d-yessefhem nnuba n gma-s di terbaɛt, imi llan wid i as-yeqqaren d Ɣilas i d imḍebber n tidet, mačči d Crif. Yenna-d uselway, ɣas d tidet yettɛawan-it gma-s, ttemcawaren, rray aneggaru d netta kan i t-itteṭṭen.

Ivirusen i d-yezzin i terbaɛt

Yewwi-d daɣen uselway Crif Mellal awal ɣef wid yebɣan ad t-ssabuṭin, ad rẓen tarbaɛt taqbaylit. Yenna-d imdanen-a ur bɣin mi ibeddel aṭas n tlufa daxel uxxam n JSK, imi llan rebbḥen-d adrim ɣef uɛrur n terbaɛt. Ɣef, wawal-is, yezmer ad tent-id-yefḍeḥ ɣer sdat.

M. K.

- PUBLICITÉ -