Accueil Tamazight A Lezzayer akked Ruḥ di laman d imayuten n ucennay Chabane ou...

A Lezzayer akked Ruḥ di laman d imayuten n ucennay Chabane ou Bariz

13

Mbeɛd mi iɣab azal 13 n yiseggasen ɣef unnar n ccna, ha-t-an yuɣal-d ussan-agi ineggra ucennay ilmeẓi Chabane Ou Bariz, mmi-s n taddart n Lazib Igounane Ameur di tɣiwant n Ait Aissa Mimoun. Seg useggas n 2006 mi d-yessuffeɣ tasfift-is taneggarut, iwumi isemma “Ddrewceɣ”, i yeǧǧa amḍal n uẓawan i yeɛceq segmi meẓẓi. Yuɣal yettɣenni kan sya ɣer da d tejmilin neɣ di tmeɣriwin. Ass-nni n ssebt iɛeddan 6-4-2019, i yewweḍ leɛtab-is ɣer tafat, anda yeṣṣaweḍ ad yesuffeɣ snat n tesfifin ɣef yiwet n tikkelt. D snat n tesfifin timaynutin, i d-yessufeɣ ucennay-agi ilmeẓi Chabane Ou Bariz ɣer tezrigin “Edition Tadukli” n Tizi Uzzu. Deg-sent maraw d snat (12) n tezlatin yeččuren d sser d wawal ḥlawen, zeddigen. Isental igejdanen n snat-agi n tesfifin, cudden deg tuget ɣer tmetti, gar tejmilin, liḥala n tmurt, tudert n umeɛḍur, lehmum n ddunit…atg. Di tesfift tamezwarut, i wummi isemma “Lezzayer”, yecna deg-s setta (6) n tezlatin s teqbaylit tamsarit, iweznen, icebḥen aṭas. Gar yizwal n 06 n tuɣac yellan deg-s nezmer ad d-nɣer: Weyya-k ay ul-iw, Yettzad lhem-iw, Lezzayer…atg. Di tezlit-agi taneggarut “Lezzayer”, i yextar d azwel n album-agi, yettmeslay-d deg-s ɣef liḥala n tmurt n Lezzayer. Ma di tesfift tis snat, iwumi isemma “Ruḥ di laman”, yecna diɣ deg-s setta n tuɣac. Azwel n uḍebsi-agi, yekkes-it-id seg yiwet n tezlit swayes i d as-yerra i yemma-s (yemmuten) tajmilt meqqren. Ɣer tama n tezlit-agi, llant xemsa-nniḍen, ad d-nebder: Ameɛḍur, zzman…atg.Ɣer taggara, nessaram-as tuɣalin igerrzen i ucennay-agi yeččuren d tabɣest, nessaram-as daɣen amecwar ɣezzifen sya d tasawent.

A. A.