Accueil Tamazight Acimi teḥbes TQ5 ?

Acimi teḥbes TQ5 ?

276

Asmi i d-yettwaberreḥ yisalli n usnulfu n TQ5, tiliẓri taqbaylit tamezwarut deg umezruy, ayendin d asirem i d-yenneɣlen ɣef yimesdurar, acku ḥsan s wazal n wallal-a n teywalt i nutni d teḍfert-nsen. D acu kan, seg maggu yezrin, ufan Yiqbayliyen ur tetteddu ara tiliẓri-a deg ugensa, send ddeqs n wayyuren n uqeddic.

Tamentilt n waya, ɣef wakken i d-tewwi teɣbalut-nneɣ, tcudd s tseddart tamezwarut ɣer teɣẓint n tedrimt i yeṭṭfen takebbanit TQ5 Media. Iban-d lḥal dɣa, ur ssawḍen yimḍebbren-is ad qidden i uxelles n wayen akk ilaqen i tikli iwatan n tiliẓri-a. Ulamma tuɣ yella-d wugur deg uxxam n tkebbanit-a n usliẓri mi ṭṭaxren seg-s kra n yiɛeggalen imesbeddiyen, imi ur ssawḍen ad msefhamen ɣef kra n tlufa.

Di tallit-nni, iga-d asarag yiwen seg-sen akken ad d-yemmeslay i tɣamsa ɣef tsebba n uṭixer-is. Maca, mačči d ayen i yerẓan ifadden i tiliẓri-a, acku tkemmel asenɛet seg yimir-nni. Armi dɣa i d-yennulfa wugur-nniḍen imalasen-a ineggura, akken teḥbes. «Neḥbes akked ArabSat acku mačči d ayen yeffɣen fell-aɣ si tama n tedrimt. Ad d-nuɣal di kra n wakud deg ugensa-nniḍen ideg zemren ad aɣ-d-ttwalin merra. Ur nettɛeṭṭil ara ad d-nberreḥ ɣef usentel-a», i aɣ-d-yenna Racid At Ɛli Uqasi, yiwen seg yimasayen n TQ5. Ad d-nesmekti d akken axxam n TQ5 Media yezga-d di Montréal, tamurt n Kanada.

Tebda asenɛet n wahilen-is seg yennayer 2018, deg ugensa ur nettwassen aṭas Yahsat, syin tuɣal i Arabsat. Ddeqs n tedwilin i d-iɛeddan deg-s, gar-asent tid n tsekla, n tetiknulujit, n waddal, n tẓuri, n tsertit, n warrac, d wayen-nniḍen. Deg useggas n 2017, ayendin d ineḍruyen i d-yettwaheggan i useqleɛ n usenfar-a n TQ5 d usḥulfu n medden ɣef wazal-is, ama d imensi imezdi, igalaten n ccna, isaragen di Tmurt d Turuft, ameslay i tɣamsa d uheggi n ustudyu iwulmen d terbaɛt ara yesselḥu ahilen n tiliẓri-a.Tura akka, meskud aḥbas n TQ5 d amakud kan, ttraǧun Yiqbayliyen tuɣalin-is s lḥir.
M. K.