Teḍra-d di duǧember-a yezrin temlilitnniḍen ɣef twennaḍt, neɣ ayen iwumi ssawalen s tewzel « COP ». Mbeɛda COP21 di Paris (Fransa), COP22 di Merrakec (Merruk), COP23 di Bonn (Talmant), COP24 di Katowice (Pulunya), tella-d ihi COP25 di Madrid, tamurt n Spenyul, ɣef teɣzi n 13 n wussan. Kkin deg usarag-a ameqqran qrib 200 n tmura i d-yuznen wid ara yemmeslayen ɣef yisem-nsent. Ɣef wakken i d-tewwi tɣamsa n umaḍal, ur tewwiḍ ara temlilita ɣer ugemmuḍ igerrzen i ugama d umdan.
Ayendin d isegbaren d yimeɣnasen isdukklanen i d-ibeggnen asḥissef-nsen seg tuqin n tmasit d lebɣi ɣur tuget n wid yekkin deg usihar-a n Tuddsa n Waɣlanen Yeddukklen (ONU). Ssebba n waya, imi ugint kra n tmura timeqqranen amsefham ɣef kra n tlufa, am Marikan, Brazil, Ccinwa d tiyaḍ. Ulamma d nutenti i yessamasen amaḍal s buhan, s wayen akk i d-xeddment d lgaz i yettḍurrun tignaw, wanag ugin yigensasen-nsent (représentants) ad stenyin ɣef kra n yiɛeqqayen ara iḍemnen asenqes n usuffeɣ n CO2. Ameslay ɣef tulacit n lebɣi i ubeddel d useɣti ɣur yimekkiyen n tɣimit-a n Madrid, yedda-d deg yiles n waṭas n yimḍebbren, am wid n Kulumbya d Ccili d wiyaḍ.
Ihi ma yella ur tesmurres teẓrigt-a, d ibaɣuren idamsanen i iɛeddan d imezwura. Ilaq ad d-nini d akken tura tban taluft ɣef twennaḍt si tama n tussna, imi d-qqaren yimassanen akken ad neswexxer tawaɣit ilaq ad nesseqes xersum 2 n tseddarin seg lḥamu i iteffɣen ɣer tegnaw, neɣ mulac ad dyeglu lḥamu-a s ubaxix deg yiseggasen i d-iteddun. Abeɛda imi d-iban yakan uddebdeb akuluji, s tseddarin i yewwḍen ɣer 50 deg waṭas n tamiwin n umaḍal.
M. K.