Ɣef wawal n wufrin n Useqqamu aɣerfan awilay n Bgayet, Mass Buquca Yusef, yettwawexxer wazemz n uberreḥ s yigemmaḍ n umsizwer n taddart zeddigen ɣer wass n 5 deg wayyur n tuber.
Yuɣ lḥal, tuɣ yetturaǧu uberreḥ-a sɣur tɣiwanin d tddukkliwin timekkiyin i 20 ɣuct iɛeddan, d asmekti n Uswir n Ssumam, maca yella-d ɣer taggara ubeddel n rray ɣef waya. Ɣef tmentilt n uselḥem n wazemz n uberreḥ, yenna-aɣ-d Mass Buquca: « Ssebba tameqqrant d mi ur wjiden tuget n wid yekkin, nebɣa ad asen-nefk ugar n wakud. Nemsegraw nekni s teseqqamut akked wid terza taluft, nemsefham ad nerr azemz n uberreḥ d 5 tuber i d-iteddun », i aɣ-d-yenna win i d-yelhan d uḥric n teywalt d yilemẓiyen deg Useqqamu aɣerfan awilay n Bgayet yiwet n tallit. Ɣef tmuɣli n kra n medden, ula d tanekkra taɣerfant tamirant, tewwi-d kra n uɛeṭṭel i tɣiwanin send ad semdent iqeddicen-nsent.
Ad d-nesmekti d akken ddeqs n tɣiwanin i yenwan tazwara ad kkint deg umsizwer-a, maca brant i ṭṭbel deg waman, uɣalent ɣer deffir ɣef tmentilt n lexsas n ttawilat i ukemmel n yisenfaren-nsent n usizdeg d ucebbeḥ, i d-bdant yakan deg tegrest yezrin. Armi ihi, ɣef wakken i d-tewwi teɣbalut-nneɣ, ur ɛeddant ara 41 n tɣiwanin i yekkin aseggas-a, seg 52 i inuḥen di Bgayet. Ma yella nemmeslay-d ɣef teseqqamut ara d-yelhun d uskazel d usenqeḍ n lecɣal n tɣiwanin, ad tebdu tuffɣa-ines ɣer unnar deg cutember i ddeg-i nella, dima ɣef wawal n Mass Buquca Yusef. « Ad tebdu teseqqamut tuffɣa ass n 5 ctember s yiwen n wahil beddemma. Sya ɣer 5 tuber, ad tili tekfa dayen ccɣel-is», i d-yenna.
Yewwi-d ad d-nerr awellih d akken ad ttunefken merra 8 n warrazen, gar-asen 5 i tuddar, 3 ad d-siḥen i yigmamen. Ma d azal n warrazen ara yettunefken, ad d-nebder arraz amezwaru ara yilin d 500 n yimelyan n santim, akked wis 8 i yewwḍen ɣer 100 n yimelyan n santim.
M. K.