Accueil Tamazight ‘’Ad d-teffeɣ tesɣunt taseklant Fouroulou deg ussan i d-iteddun’’

Ali Feraoun, d mmi-s n Mouloud Feraoun

‘’Ad d-teffeɣ tesɣunt taseklant Fouroulou deg ussan i d-iteddun’’

310

I lmend n usmekti wis 58 n tmenɣiwt n Lmulud At Caɛban (Mouloud Feraoun), nesseqsa mmi-s Ali ɣef wanda yewweḍ leqdic n Tesbeddit Mouloud Feraoun imi d netta i d aselway-is. Ɣef waya, yenna-d : ‘’Tella-d Tesbeddit Mouloud Feraoun i yidles d usedwel, i d-ilulen deg useggas n 2012, i wakken ad d-tessifrir isem n Mouloud Feraoun akked leqdicat-is, ladɣa i tsutwin timeẓyanin. Aṭas n leqdicat i nexdem, ama d isaragen neɣ timsikniyin. Mačči kan dagi deg lwilayat n daxel, meɛna ula deg usammar, deg unẓul d umalu, am Batna, Wehran, Sṭif, Xennecla, Sɛida, Biskra akked tiyaḍ. Nezmer ad d-nini, nxeddem azal n 12 ɣer 15 n temliliyin deg useggas.

D Tasbeddit Mouloud Feraoun i yidles d usedwel i d-yeskecmen, i tikklet tamezwarut, amsuḍen n tira n umaru. Aṭas n yimussnawen n taɣult-agi i ixedmen akked Tesbeddit Mouloud Feraoun i wakken ad fken afus n tallelt i Mass Abdelwahab Medjadj, amaray amatu n Tesbeddit i yessawḍen ad yexdem azal n 5 000 n yisebtar gar wayen yura Mouloud Feraoun. Leqdic-agi, ad yili deg uẓeṭṭa inmetti i wid yebɣan ad t-yesseqdec, ama d inelmaden, isdawanen neɣ wid yettnadin s umata ɣef tira n Mouloud Feraoun. Iswi agejdan n Tesbeddit, d tullya n yiwen n wammas i medden anda ara yilin yidlisen n temkerḍit n Mouloud Feraoun, ayen yura d tɣawsiwin-is s umata. Deg useggas n 2019, teqdec Tesbeddit akked yiwen n umsuffeɣ i wakken ad d-swejden yiwen n usaru-arrat ɣef Mouloud Feraoun i lmend n umulli wis 60 n timunent n Lezzayer akked lmut n Mouloud Feraoun.

Ma ɣef yisenfaren ara d-yilin deg ussan i d-iteddun, ad d-nebder tuffɣa n tesɣunt taseklant Fouroulou, asizreg n wungal ‘’La cité des roses, livre que Feraoun avait titré L’anniversaire’’, anda ara yili, diɣ, ciṭ n umeslay ɣef Etsuko Aoyagi n tesdawit n Tokio i yessuqlen u yesizergen deg Japon ungal ‘’Le fils du pauvre’’ deg useggas n 2017. I usmekti, i lmend n tuffɣa n wungal-agi, tella-d temlilit deg Tokio anda teḥder Tesbeddit Mouloud Feraoun i yidles d usedwel. Am wakken ad yili usizreg-nniḍen sya ar anebdu n ’’Journal 1955/1962’’ anda ara d-ddun tikkelt-a iḍrisen yura Feraoun deg meɣres, wid-nni ur d-neddi ara deg tezrigt n 1962. Am wakken ara d-yili usizreg s taɛrabt n ’’Journal 1955/1962’’ i yettwaxedmen deg Maṣer. Llan diɣ aṭas n yisenfaren i useggas-agi n 2020, ara d-nini deg lweqt-nsen’’.
Yesteqsa-t H. Moula