D tasɣunt Aselmad ara d-yuɣalen i tikkelt tis ṣat. D tagnit i wid yettarun d wid iḥemmlen ad ɣren s tutlayt n tmaziɣt, ad tt-ṭṭfen gar yifassen-nsen mi ara tewjed. Akka i t-id-berrḥen sin n yimsuddsen-ines deg uzeṭṭa n Facebook ass-nni n, 17 meɣres yezrin. Temmug tesɣunt Aselmad i waṭas n taggayin, s zzyada ɣef uselmad, imi d isem-is i terfed. Yettaf-itt d allal, yessemras-itt i uselmed, s ufran n yiḍrisen yemgaraden di tewsatin, ama d aglam, d imsegzi, d imesfukel … i uselḥu n temsirin-is. Ttafen-tt daɣen yinelmaden d aɣbalu i ulmad d tallelt s umaynut i ttafen deg-s.
D tagnit i wid yeqqaren s tmaziɣt, ama i usɛeddi n wakud, ama i ulmad n tira neɣ n tutlayt. Akken daɣen i zemren ad arun deg-s ama d wid yennumen yakan ttarun s tmaziɣt seg yineɣmasen, imeɣnasen, imedyazen. D iswi akken ara temgarad tewsit n tira s ubaɣur d tarrayt n yal yiwen, acku yal win ara yarun, yella d acu n tmussni neɣ n umaynut ara d-yernu. Tasɣunt n tikkelt-a, ur tettemgarad ara ɣef tid yezrin, imi deg-s ad ilin yiḍrisen yemgaraden di tsekkiwin d wanawen, kra n yiḍrisen n tussna, tijmijlin, timucuha d tneqqisin, cwiṭ n tmedyazt, uraren d tefɣulin akked temsirin n tmaziɣt i sin n yiswiren, i yiselmaden neɣ i yinelmaden n tmaziɣt.
Akken i t-id-yenna Mehenna Halit ihi, i wid yebɣan ad kkin, ad aznen ayen uran uqbel azemz n, 10 yebrir 2020, ɣer yisebtar-a n Facebook : Mehenna Firmus Halit neɣ Lyes Belaidi. Neɣ ɣer umayel-a: [email protected] neɣ [email protected], akken ara tewjed i Tefsut n Yimaziɣen 20 yebrir 2020. D tagnit akken ad gerrzen yiḍrisen ara yettwarun, deg wussan-agi n tugdi yeṭṭfen amaḍal s unfafad amihan i d-yennulfan, i yeǧǧan aṭas n yimdanen ad zgen deg yixxamen.
Kh. A.