Tesɛa tenmehla n Srabes n tfellaḥt n lwilaya n Tizi Uzzu, deg yiseggasen-agi ineggura, yiwen n wahil igerrzen s waṭas, anda ṭṭuqten wussan n tussna akked tuffɣiwin n useɛlem d uwelleh ɣef lehlakat yemgaraden i yettḥazen imɣan d tfellaḥt. Rnu ɣef waya, ahil n unegmu n uḥric n tfellaḥt n lwilaya.
Dɣa deg wahil n Srabes n tefllaḥt, tettwajerred-d yiwet n teswirt (séminaire) taɣelnawt n uḥric n ttrebga n tɣeṭṭen. Tettuεeggen temlilit-a, ad d-tili deg 3 seg waggur n yulyu 2019, deg dayra n Tegzirt. Yiwen unejmuε yella-d deg wass n letnayen iεeddan, 10 deg waggur n yunyu deg Tenmehla n Srabes n tfellaḥt n Tizi Uzzu, anda i tt-gezmen deg rray ɣef tugeṭ n leqdicat ara d-yilin deg wahil n teswirt taɣelnawt.
Yeḥḍer deg unejmuε-agi uqerru n OPAT (Organisation de Production et de l’Appui Technique), Mass Chebbaḥ Sid-Aḥmed, yellan d imeḍebber n unejmuε, d umaswaḍ n imejjayen n yiɣersiwen n Tizi Uzzu (IVW Inspection vétérinaire de Wilaya), d yikataren n Tenmehla n Srabes n tfellaḥt n Tizi Uzzu, imḍebbren n srabes n tfellaḥt n tɣiwant n Freḥa d dayra n Tegzirt. Ttekin daɣen yimḍebbren n Teseqqamut n tfellaḥt n lwilaya n Tizi Uzzu (CAW), aselway n CNIF n uyefki, CRMA.
Rnu ɣef waya, isdawaniyen n tesdawit Mouloud Mammeri n Tizi Uzzu, ITMAS n Boukhalfa, d ITELV, d srabes n ANSEJ, CNAC, BADR d tddukkla n yifellaḥen yettrebin tiɣeṭṭen d waṭas-nniḍen. Awal yella-d ɣef usuddes n teswirt ladɣa isaragen ara yilin i lmend n wass-agi n tussn d waṭas n temsal i icudden ɣer wahil n wass-ni.
Ali Zalouk